Azərbaycan, Bakı, 23 noyabr / Trend müxbir T.Cəfərov/
İranın Ştatdan kənar Fəhlələr Birliyinin sədri Fəthullah Bəyat dövlətin işsizliyin aradan qaldırılması sahəsində yürütdüyü siyasətin effektsiz olduğunu bildirib və deyib ki, "İş haqqında" qanununa ediləcək düzəlişlər Parlamentdə təsdiq olunarsa, ölkədə işsizliyin səviyyəsi ilin sonunadək (İranda il martın 21-də dəyişir) hazırkı 20 faizdən 25 faizədək artacaq. Bu barədə Trend İranın İLNA xəbər agentliyinə istinadən məlumat verir.
İranın hazırkı "İş haqqında" qanununun 41-ci maddəsində göstərilir ki, fəhlələrə əməkhaqqı gündəlik 8 saat iş rejimi əsasında ödənilir. Lakin qanuna dəyişiklik təsdiq olunarsa, fəhlələrə əməkhaqqının ödənilməsi sistemi dəyişəcək və əmək haqqı fəhlələrin gördüyü işin, onların işdəki aktivliyinin müqabilində veriləcək.
"İş haqqında qanuna düzəlişlərin edilməsi yalnız dövlətin maraqlarını qoruyur və fəhlələr bu dəyişikliklərlə razı deyil", - Bəyat deyib.
O bildirib ki, fəhlələrin əməkhaqları mövcud inflyasiyaya görə artırılmaldır.