Azərbaycan, Bakı, 23 noyabr /Trend, müxbir A.Axundov/
Azərbaycan Mərkəzi Bankı (AMB) 2012-ci il üzrə dövlət büdcəsində 20 milyon manat səviyyəsində qoyulan sosial ipoteka üzrə xərcləri qeyri-kafi hesab edir. Trend-in məlumatına görə, bu barədə çərşənbə günü Mərkəzi Bankın İdarə Heyətinin sədri Elman Rüstəmov Milli Məclisdə 2012-ci il və növbəti üç il üzrə dövlət büdcəsi layihəsinin müzakirəsi zamanı deyib.
"Sosial ipoteka çox vacib sosial proqramdır. Bu təkcə sosial deyil, həmçinin, iqtisadi yönümlü proqramdır. Belə ki, iqtisadiyyatın tikinti sektoruna dəstək verir, orada işçi yerləri yaradır. Biz 2012-ci ildə ayrılacaq 20 milyon manatı qeyri-kafi hesab edirik, buna əlavə vəsaitlərin ayrılmasını nəzərdən keçirmək lazımdır. Bunun üçün ölkənin maliyyə imkanları var", - Rüstəmov bildirib.
Onun sözlərinə görə, sosial ipoteka ala biləcək təsdiq edilmiş kontingent hazırda 100 min nəfər təşkil edir.
"Nəzərə alsaq ki, sosial ipotekanın maksimal həcmi cəmi 35 min manat təşkil edir, o zaman bu 20 milyon manat cəmi 600 nəfəri ipoteka kreditləri ilə təmin etmək üçün kifayət edəcək. Banklarda təxminən ümumilikdə 80 milyon manat dəyərində sosial ipoteka üzrə sorğular artıq qeydiyyatdan keçib. İnsanlar bu sistemdən istifadə etmək istəyirlər, bu vəsaitləri gözləyirlər", - Rüstəmov deyib.
Onun sözlərinə görə, bu gün sosial ipotekanın şərtlərini yumşaltmaq imkanı var.
"Bu məsələ qarşıda kəskin şəkildə durub və həllini gələn il tapa bilər", - Rüstəmov qeyd edib.
Hazırda AMB yanında Azərbaycan İpoteka Fondunun (AİF) şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün isə 20 faiz təşkil edir.
Kreditlər milli valyutada - manatla və yalnız Azərbaycan vətəndaşlarına verilməlidir, ipotekanın predmeti yalnız mənzil və şəxsi evlər ola bilər, ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 80 faizini, kreditə görə aylıq ödəniş borcalanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin maksimum üç il xidmət stajı olan hərbiçilərə şamil edilir.
Güzəştli ipoteka krediti alan hər ailə bundan yalnız bir dəfə istifadə edə bilər. Hazırda İpoteka Fondunun 23 müvəkkil bankı var.
Noyabrın 23-nə olan rəsmi məzənnə 0,7865 AZN/USD təşkil edir.