Azərbaycan, Bakı, 9 dekabr /Trend, müxbir A.Axundov/
Azərbaycan Fövqəladə Hallar Nazirliyi ölkədə "Xruşovka" layihəli binaların taleyi ilə bağlı dövlət proqramı layihəsinin hazırlanmasını 2012-ci ildə başa çatdırmağı planlaşdırır. Bu barədə cümə günü Trend-ə Fövqəladə Hallar Nazirliyinin Tikintidə Təhlükəsizliyə Nəzarət üzrə Dövlət Agentliyinin rəis müavini Elxan Əsədov deyib.
"Biz indi proqram üzərində işləyirik. İşi gələn il başa çatdırmağı və layihəni ölkə hökumətinə təqdim etməyi planlaşdırırıq", - Əsədov qeyd edib.
Fövqəladə hallar naziri Kəmaləddin Heydərovun əvvəl dediyinə görə, Azərbaycan hökumətinə "Xruşovka" layihəli binaların müəyyən formada bərkidilməsi və ya digər işlər görülməsi barədə təklif veriləcək.
"Biz hökumətə təklif verəcəyik ki, "Xruşovka" layihəli binalarda gələcəkdə hansısa formada bərkitmə işləri aparılsın, ya da onlar dəyişdirilsin", - Heydərov deyib.
Nazir əlavə edib ki, bu, dünya təcrübəsində də var, bizim təcrübəmizdə də yaxınlarda tətbiq ediləcək.
Onun sözlərinə görə, Azərbaycanda sovet dövründə və ondan qabaq inşa olunmuş binalar var ki, onlar öz istismar müddətini başa vurub. Fövqəladə Hallar Nazirliyi tərəfindən bu binalar təhlil edilir.
Bir müddət əvvəl Dövlət Şəhərsalma və Arxitektura Komitəsinin sədr müavini Dövlətxan Dövlətxanov bildirmişdi ki, Komitə Bakıda "Xruşovka" layihəli binaların sökülməsinə ehtiyac görmür.
"Xruşovka"ların istismarı 50 il müddətinə hesablanmışdı. Azərbaycanda iqlim şəraiti Rusiya və digər ölkələrdə olduğu kimi sərt deyil. Araşdırmalar göstərir ki, ölkəmizdəki bu binalar onların dərhal sökülməsini tələb edən vəziyyətdə deyillər", - Dövlətxanov bildirib.
Onun sözlərinə görə, lakin bu məsələ 2030-cu ilə qədər Böyük Bakının İnkişaf Planında nəzərə alınacaq.