Azərbaycan, Bakı, 13 dekabr /Trend, müxbir A.Axundov/
Azərbaycanın sığorta şirkəti "Standard Insurance" 2012-ci ildə ölkənin regionlarında iştirakını genişləndirməyi planlaşdırır. Bu barədə çərşənbə axşamı Trend-ə şirkətin idarə heyətinin sədr müavini Aydın Rəhmanov məlumat verib.
"Hazırda regionlarda üç nümayəndəliyimiz var - Gəncə, Şəki və Lənkəran. 2012-ci ildə onların sayının 10-a qədər artırılması planlaşdırılır", - Rəhmanov bildirib.
Onun sözlərinə görə, həmçinin, Bakının özündə nümayəndəliklərin sayının artırılması planlaşdırılır.
"Gələn il hər hansı yeni xarici bazarlara çıxmaq üzrə konkret planlarımız yoxdur. Biz yalnız Gürcüstanda törəmə şirkətimiz - "Standard Insurance Georgia"nı inkişaf etdirəcəyik. Bu şirkətin kapitalının artırılması üzrə hələlik planlarımız yoxdur, o, kifayət qədər böyükdür", - Rəhmanov deyib.
"Standard Insurance Georgia" 2007-ci ilin noyabrında 1,6 milyon lari dəyərində (yaradılan zaman məzənnə üzrə təxminən 1 milyon dollar) nizamnamə kapitalı ilə yaradılıb.
Gürcüstandakı törəmə şirkət üçün 2011-2012-ci illər təşəkkül dövrüdür. "Şirkət Gürcüstanın sığorta bazarında getdikcə özünə daha çox ad qazanır", - Rəhmanov qeyd edib.
Onun sözlərinə görə, Gürcüstanın sığorta bazarında, o cümlədən bu ölkədə fəaliyyət göstərən Azərbaycan şirkətləri arasında da xeyli potensial var.
Azərbaycanın ən iri sığorta şirkətlərindən biri olan "Standard Insurance" bazarda 2002-ci ildən fəaliyyət göstərir. Şirkət 28 sığorta növü üzrə xidmətlər göstərir.
