Azərbaycan, Bakı, 16 dekabr /Trend, müxbir A.Axundov/
Azərbaycan Hesablama Palatası 2012-ci ildə auditor yoxlamalarının sayını artırmağı planlaşdırır. Bu barədə cümə günü Trend-ə palatanın sədr müavini Adil Məhərrəmov deyib.
"Bu il təxminən 23 yoxlama aparılıb. Yoxlamalar "Azərenerji", Dövlət Sosial Müdafiə Fondunun bir neçə rayon şöbəsi, Tibb Universiteti və digər təşkilatlarda olub. Hazırda Memarlıq və İnşaat Universitetində yoxlama aparılır", - Məhərrəmov bildirib.
Onun sözlərinə görə, Hesablama Palatasının yoxlamaların sayını artırmaq cəhdinə baxmayaraq, son illər bu göstərici ildə 23-25 yoxlama təşkil edir.
"Gələn il yoxlamaların sayı arta bilər. Onların sayı nə qədər çox olarsa, məlumat da bir o qədər çox olacaq və biz daha dəqiq rəy verə biləcəyik. Ümumiyyətlə, auditin məqsədi nöqsanları axtarmaq deyil, məlumat toplamaqdır", - Məhərrəmov qeyd edib.
O bildirib ki, 2011-ci ildəki yoxlamaların icmalı hələ ki aparılmayıb və nəticələr haqqında məlumatı gələn ilin əvvəlində əldə etmək mümkün olacaq.