Azərbaycan, Bakı, 27 dekabr /Trend, müxbir N.İsmayılova/
Azərbaycan Mərkəzi Bankı (AMB) hazırda lisenziyası geri çağırılmış bankların ləğvetmə prosesi ilə bağlı hər hansı problemin mövcud olmadığını təsdiq edib. Bu barədə çərşənbə axşamı Trend-ə bankdan məlumat veriblər.
"Ləğv etmə prosesində olan bankların lisenziyaları geri alınarkən, onların balans göstəriciləri, o cümlədən əmanət portfeli çox cüzi məbləğ təşkil edirdi və onların ləğvi sektora təsirsiz ötüşüb", - AMB-dən deyiblər.
Mərkəzi Bankda qeyd ediblər ki, ümumiyyətlə, bankların ləğvi prosesi mövcud qanunvericilik və prosedurlar çərçivəsində həyata keçirilir.
Hazırda ölkədə 5 bankın ləğvetmə prosesi keçirilir. 2008-ci ilin iyulunda AMB "Atlantbank" və "Poçtbank"ın bank fəaliyyəti göstərməsinə görə verilən lisenziyaların geri çağırılması haqqında qərar qəbul edib. Buna səbəb bankların məcmu kapitalın tələblərini yerinə yetirməməsi, eləcə də idarəetmə və mövcud əməliyyatların həyata keçirilməsi zamanı prudensial qaydalara riayət etməməsi olub.
2010-cu ilin dekabrında "Debutbank" və "Kövsərbank"ın lisenziyaları ləğv edilib. Bu qərar minimum məcmu kapitalın tələblərinin yerinə yetirilməməsi, bank qanunvericiliyi tələblərinin pozulması, eləcə də idarəetmənin və cari fəaliyyətin etibarlı və prudensial qaydada yerinə yetirilməməsi ilə izah edilir.
2011-ci ilin yanvarında AMB-nin idarə heyətinin qərarı ilə "Birlikbank"a fəaliyyət göstərməsi üçün verilən lisenziya ləğv edilib.