Azərbaycan, Bakı, 9 yanvar /Trend, müxbir N.İsmayılova/
2012-ci ildə ABŞ-ın Beynəlxalq İnkişaf Agentliyi (USAID) demokratiya və idarəetmə, iqtisadi artıma dəstək, səhiyyə sahələrində layihələrin həyata keçirilməsi üzrə Azərbaycan hökuməti ilə işləməyə davam edəcək. Bu barədə bazar ertəsi Trend-ə USAID-in Bakı ofisindən məlumat veriblər.
"USAID 2011-ci ildə yuxarıda qeyd olunan layihələr də daxil olmaqla, 15-dən çox layihəyə dəstək göstərmək üçün 18,4 milyon dolları ayırıb", - agentlikdən bildiriblər.
2011-ci ildə başlanan yeni sosial-iqtisadi inkişaf layihəsi sayəsində USAID 100-dən çox icmada 150 infrastruktur layihəyə dəstək göstərəcək, icma inkişaf şuralarının aktivləşdirilməsi və yaradılmasına kömək edəcək, həmçinin treninq, əlaqələndirmə, məlumat və təcrübə mübadiləsi vasitəsilə həmin şuraların bacarıqlarını gücləndirəcək. Bu layihə Azərbaycan hökuməti ilə birgə maliyyələşdirilir.
Bundan başqa, USAID cari ildə də ATƏT ilə birgə işləyərək insan alveri ilə mübarizə üzrə hökumətin səylərini dəstəkləyəcək.
USAID-in ictimai məlumatlılığı gücləndirməklə, ictimai-siyasi proseslərdə qadınların nüfuzunu və iştirakını artırmaqla, habelə qadın və gender məsələləri üzrə işləyən vətəndaş cəmiyyəti təşkilatları və hökumət qurumlarının bacarıqlarını inkişaf etdirməklə Azərbaycan cəmiyyətində qadınların ictimai-iqtisadi statusunun yaxşılaşdırılmasına yönələn yeni iki illik Qadınların İştirakçılığı Proqramının həyata keçirilməsi davam etdiriləcək.
Rəqabətlik və ticarətin artırılması üzrə daha bir layihə 2012-ci ildə Azərbaycan hökumətini Ümumdünya Ticarət Təşkilatına qəbul olunması, pulların yuyulması və terrorçuluğun maliyyələşdirilməsi ilə mübarizə sahəsində beynəlxalq tələblərə uyğunlaşdırılması, hədəf seçilmiş kənd təsərrüfatı məhsulları üzrə beynəlxalq ticarət tələblərinə cavab verilməsi, habelə Azərbaycanda daha çox investisiya və inkişafı stimullaşdırmaq üçün qanunvericiliyin və onun yerinə yetirilməsinin yaxşılaşdırılması məsələlərində dəstəkləməyə davam edəcək. Bu layihə də Azərbaycan hökuməti ilə birgə maliyyələşdirilir.
Azərbaycanda səhiyyənin gücləndirilməsi layihəsi üzrə USAID-in proqramı qabaqcıl təcrübədən istifadə etməklə bu sahədə islahatlara xüsusi diqqət ayıracaq.
