Azərbaycan, Bakı, 31 yanvar / Trend, müxbir İ. Xəlilova /
Azərbaycanda Almaniyanın KfW inkişaf bankının yaratdığı Kredit Zəmanət Fondunun (KZF) fəaliyyəti dayandırıla bilər. Bu barədə çərşənbə axşamı Trend-ə bankın Bakıdakı ofisindən məlumat verilib.
"Fondun 2008-ci ildən işləməyə başlamasına baxmayaraq, indiyədək bir dənə də zəmanət verilməyib. Avropanın maliyyə bazarlarında böhranın ikinci dalğasının yetişməsi ilə əlaqədar Azərbaycan bankları tərəfindən Avropanın maliyyə institutlarından kredit cəlb edilməsi vəziyyəti getdikcə mürəkkəbləşir", - KfW ofisindən deyiblər.
Fondun bağlanması məsələsi KfW-nin Azərbaycandakı maliyyə məsələləri üzrə meneceri Herald Hyuqnerin Bakıya səfəri zamanı müzakirə olunacaq.
Fondun fəaliyyətə başladığı dövr dünya maliyyə böhranı ilə eyni vaxta təsadüf edir. Ona görə də xarici bankların likvidliklə bağlı davam edən problemləri, eləcə də Azərbaycan Mərkəzi Bankının tətbiq etdiyi məhdudiyyətlər üzündən yerli banklar xarici borcların cəlb edilməsi üçün KZF-nin zəmanətlərindən faydalana bilmirlər.
Hyunger ötən ilin sentyabrında Bakıya sonuncu səfəri zamanı Azərbaycan bankı Bank of Baku-ya ilk zəmanətin 2012-ci ilin birinci rübündən gec verilməyəcəyini bəyan etmişdi. Almaniyanın "CommerzBank"ından təxminən dörd milyon avro həcmində zəmanətli kredit alınacağı gözlənilir. Bundan daha əvvəl "AGbank" "CommerzBank"ın zəmanətli kreditini almaq istəmişdi.
Yaradılan fondun KfW tərəfindən maliyyələşdirilməsinə dair müqavilə 2006-cı il avqustun 14-də Bonnda Azərbaycan-Almaniya hökumətlərarası danışıqlar zamanı bağlanıb, Azərbaycanda KZF-nin yaradılmasına dair maliyyə əməkdaşlığı üzrə hökumətlərarası saziş isə ölkə Prezidenti tərəfindən 2007-ci il iyunun 5-də imzalanıb.
2008-ci ilin avqustunda KfW Azərbaycan İqtisadi İnkişaf Nazirliyi ilə Almaniyanın Əmanət Kassaları üzrə Beynəlxalq Əməkdaşlıq Fondunun (SBFIC) işə başlaması haqqında müqavilə bağlayıb. Lakin ötən müddət ərzində Azərbaycan banklarının cəlb etdiyi xarici borclar üçün heç bir zəmanət verilməyib. Belə vəziyyət dünya maliyyə böhranı ilə əlaqədar mürəkkəbləşib. Nəticədə Avropa bankları kredit xətlərinin verilməsinə hazır olmayıblar.
KZF-nin başlıca şərti ondan ibarətdir ki, fondun zəmanəti əsasında cəlb edilən vəsaitlər Fondun biznes-sxemi üzrə orta və kiçik biznesin inkişafına yönəldilməlidir və ya banklar bu sektorda yerləşdirilən elə eyni məbləğdə portfeli yaratmalıdırlar.
Kredit-Zəmanət Fondu KfW-nin mənzil-qərargahında hesablaşma hesabı şəklində fəaliyyət göstərməlidir. Azərbaycan banklarının müraciət edəcəyi halda, məsləhətçi onları yoxlayacaq və KfW qarşısında zəmanətin verilməsi ilə bağlı çıxış edəcək.
KfW Azərbaycana Kredit Zəmanət Fondunun yaradılmasına 4 milyon avro verib. Bunun 3,75 milyon avrosu fondun yaradılmasına zəmanət qismində, 0,25 milyon avro isə məsləhətçi xidmətlərinin ödənilməsinə görədir. Qalan vəsaitlər Fonda Azərbaycan hökuməti tərəfindən köçürülüb.
KZF-nin zəmanəti cəlb edilən kredit məbləğin 90 faizi həcminə qədər verilə bilər, buna müvafiq olaraq qalan 10 faiz bankın şəxsi riski altında olacaq.
