Azərbaycan, Bakı, 29 fevral /Trend, müxbir Ə.Həsənov/
Azərbaycan Beynəlxalq Bankının 100 faiz mülkiyyəti olan "AzeriCard" prosessinq mərkəzi 2012-ci ildə plastik kart bazarının genişlənəcəyini gözləyir.
"AzeriCard"ın biznesin inkişafı üzrə rəhbəri Cahangir Məmmədov çərşənbə günü Trend-ə bildirib ki, bu, bankların kartların emissiyası üzrə planlarından, habelə müştəri bazasından asılıdır.
"Ölkədə nağdsız hesablaşmalar üzrə əməliyyatlar artır, lakin bu, kartların sayının artması anlamına gəlmir", - Məmmədov qeyd edib.
Hazırda Azərbaycan bazarında "AzeriCard"ın xidmət göstərdiyi kartların sayı iki milyon ədədə çatır ki, bu da ölkənin bütün kart bazarının təxminən 45 faizini təşkil edir.
"Kart bazarının inkişafı üçün ticarət müəssisələrinin ödənişi hər yerdə kartlarla qəbul etməsi lazımdır, lakin hazırda onlar daha çox nağd hesablaşmalara maraq göstərir. Bu problemi dövlətin müdaxiləsi olmadan həll etmək mümkün deyil. Əgər mövcud problem həll edilsə, bu, ödəniş kartları bazarında əhəmiyyətli sıçrayış olacaq", - Məmmədov vurğulayıb.
