Azərbaycan, Bakı, 14 mart /Trend, müxbir A.Axundov /
Sumqayıt Texnoloji Parkı (STP) 2013-cü ilin sonunadək tam gücü ilə işləyəcək. Bu barədə hökumətin 2011-ci ilin yekunları üzrə ölkə parlamentinə təqdim etdiyi hesabatda deyilir.
"Parkda tətbiq olunan bəzi texnologiyalar təkcə Azərbaycan üçün deyil, həm də bütün region üçün yenilik hesab edilir. Məsələn, alternativ enerji üzrə bəzi qurğu və naqillər MDB-də istehsal olunmur", - hesabatda deyilir.
Bu gün texnoparkda 3 min nəfər çalışır, parkın istehsalat gücləri artdıqca işçilərin sayı da artacaq.
Hazırda texnoloji parkda 10 müəssisə fəaliyyət göstərir, 2013-cü ilin sonunadək daha səkkiz müəssisə işə salınacaq, onlardan dördünün isə bu ilin sonunadək fəaliyyətə başlayacağı gözlənilir.