Azərbaycan, Bakı, 22 mart /Trend, müxbir H.Vəliyev/
Rusiyanın "Bank Texnologiyaları" BPM" sistemli inteqratoru SmartVista məhsulları ailəsinin tətbiqi prosesini və Azərbaycan bankı "Bank of Baku"da şəxsi prosessinq mərkəzinin yaradılmasını başa vurur. Trend-in məlumatına görə, bu barədə şirkətin cümə axşamı yaydığı məlumatda deyilir.
Bu, həmin Rusiya şirkətinin Azərbaycanda ikinci layihəsidir.
Prosessinq mərkəzinin yaradılması üzrə birinci layihəni şirkət Azərbaycan bankı "TexnikaBank"la həyata keçirib. Həmin layihə çərçivəsində TexKart yaradılıb və 2010-cu ilin fevralından fəaliyyətə başlayıb.
Bundan əvvəl "Bank of Baku" prosessinqin autsorsinq modelindən istifadə edib ki, bu da rəqabətədavamlı məhsul və xidmətlərin hazırlanması və tətbiqi imkanlarını xeyli məhdudlaşdırırdı. Bank SmartVista həllini tətbiq etməklə yeni məhsullar bazarına çıxış imkanını bir qədər sürətləndirib, öz istifadəçiləri üçün xidmət dairəsini genişləndirib və əməliyyat xərclərini xeyli azaldıb.
Yeni platforma Bank of Baku-ya öz ödəniş biznesinə tam nəzarət etməyə, yeni kart məhsullarını operativ şəkildə buraxmağa, bankomatlar şəbəkəsini səmərəli idarə etməyə və öz müştərilərinə əlavə xidmətlər təklif etməyə imkan verib. "Bank of Baku" fırıldaqçılıq hallarından xəbərdarlıq üçün SmartGuard həllini də tətbiq edir. Bu həll transaksiyaların 100 faizlik monitorinqinin aparılmasını və fırıldaqçılıq əməliyyatlarına qarşı səmərəli mübarizəni təmin edir.
Şəxsi SMART-kartların buraxılışı kartlarla əməliyyatlar üzrə fırıldaqçılığın qarşısını almaq üzrə daxili strategiyanın reallaşdırılmasında daha bir addımdır. İndi "Bank of Baku" öz müştərilərinə MasterCard və Visa şirkətlərinin kart məhsullarının bütün spektrini təklif edir.
Bankın inkişaf planı Azərbaycan ərazisindəki bütün bölmələrin, bankomatların sayının xeyli artırılmasını və informasiya köşklərinin gecə-gündüz işləməsini təklif edir. Həmin planların həyata keçirilməsi üçün Bank of Baku "Bank Texnologiyaları" BPM"-in SmartATM həllini tətbiq edib. Bu həll bankomatlar şəbəkəsinin kompleks idarə olunmasını həyata keçirir.
SmartATM həlli real vaxt rejimində bütün bankomat şəbəkəsinin funksiyalaşdırılması, eləcə də hər bir aparatda nağd pulların həcmi haqqında məlumat əldə etməyə imkan verir.
Bu gün Azərbaycanda artıq beş prosessinq mərkəzi fəaliyyət göstərir: Azəricard, MilliKart, TexKart, RoyalCard və KapitalBank prosessinqi. Bank of Baku-nin ödəniş kartlarına MilliKart-da xidmət göstərilir.