Azərbaycan, Bakı, 18 iyul /Trend/
ARDNŞ-in "Yay təcrübəsi" proqramına start verildikdən sonra respublikanın bir sıra nüfuzlu ali təhsil ocaqlarının - Bakı Dövlət Universitetinin, Azərbaycan Dövlət İqtisad və "Qafqaz" Universitetlərinin, Sumqayıt Dövlət Universitetinin "Azərikimya" İstehsalat Birliyinin müəssisələrində istehsalat təcrübəsinə başlamış bir qrup tələbəsi ilə Birlik rəhbərliyinin təqdimat xarakterli görüşü olmuşdur.
"Azərikimya"nın konfrans zalında keçirilən görüşdə Birliyin Müşahidə Şurasının sədri, Milli Məclisin deputatı Muxtar Babayev gələcəyin kimyaçılarını salamlayıb, kamil mütəxəssislər kimi yetişmələrini arzulayaraq, onlara Azərbaycanın strateji əhəmiyyətə malik olan neft-kimya sənayesinin texnoloji bazasının möhkəmləndirilməsi, onun perspektiv inkişafı naminə Ulu öndər Heydər Əliyevin gərgin və məqsədyönlü fəaliyyətindən, ölkə Prezidenti İlham Əliyevin təşəbbüsü ilə Sumqayıtda ən yeni texnologiyalar əsasında yaradılmış Texnologiyalar parkının, Qaradağda yaradılmaqda olan neft-kimya kompleksinin, Karbamid zavodunun, geniş bir sahəni əhatə edəcək Sumqayıt Kimya Texnologiyaları parkının gələcək perspektivlərindən söhbət açmışdır.
Görüş zamanı tələbələrə videosüjetlər vasitəsilə Sumqayıtda ilk kimya müəssisəsinin yaradılmasından başlayaraq ölkənin neft-kimya sənayesinin bugünümüzədək keçdiyi geniş inkişaf yolu, "Azərikimya"nın müəssisələri və istehsal olunan müxtəlif kimya məhsulları, onların ixrac coğrafiyası və s. barədə geniş məlumat verilmişdir.
Neft-kimya sənayesinin mühəndislik ixtisasları üzrə - kimya texnologiyası, sənayenin təşkili və idarə edilməsi, üzvi kimya bölməsi, ekologiya mühəndisliyi, mühasibat uçotu və audit, elektrik təchizatı və s. üzrə ali təhsil alan tələbələr iki ay ərzində Birliyin Etilen-polietilen zavodunun müxtəlif istehsalatlarında, həmçinin Nəqliyyat və xüsusi texnika İdarəsində kimya sənayesi ilə bağlı təcrübi biliklərini artıracaq, seçdikləri ixtisasların tətbiq olunduğu sahələr üzrə ilkin adaptasiya keçəcək, nəzəri biliklərini təcrübədə daha da zənginləşdirəcəklər. Bu isə gələcəkdə ixtisaslı kadrlar kimi əmək fəaliyyətinə başlayarkən onlar üçün mühüm əhəmiyyət kəsb edəcəkdir.
Təcrübə keçdikləri müddət ərzində bağlanmış əmək müqaviləsinə əsasən mütəxəssis kimi işə qəbul olan hər bir tələbəyə müvafiq əmək haqqı ödəniləcək və onlar həmin müddət ərzində ARDNŞ-in digər əməkçiləri kimi müvafiq hüquqlardan istifadə edə biləcəklər. Gələcək kimyaçıların iş geyimi və yeməklə təminatı və s. də "Azərikimya" tərəfindən ödəniləcəkdir.
