Azərbaycan, Bakı, 8 oktyabr /Trend, müxbir C.Nəsibova/
Azərbaycan Mərkəzi Bankı yanında (AMB) Mərkəzləşdirilmiş Kredit Reyestri Xidmətində kredit hesabatlılığının təkmilləşdirilməsi planlaşdırılır. Bununla əlaqədar olaraq, orada hər bir kreditə münasibətdə ödəmə üsulları öz əksini tapacaq. Bu barədə bazar ertəsi Trend-ə Xidmətin rəhbəri Elçin Həbibov bildirib.
Onun sözlərinə görə, kredit təşkilatlarının təqdim etdikləri məlumatlar əsasında aylar üzrə kredit ödəmələrini göstərən xüsusi yeni model irəli sürüləcək.
"Bu, kredit təşkilatlarına borcalanların son 24 ay ərzində ödənişlərə münasibətlərini daha yaxşı qiymətləndirməyə, eləcə də kredit ödənişlərində ən yaxşı tarixə malik borcalanlara daha sərfəli şərtlər təqdim etməyə imkan verəcək", - Həbibov deyib.
Onun sözlərinə görə, planlaşdırılan dəyişikliklər arasında Xidmətdə informasiya sorğusunun dəyərinin azaldılmasına da baxılır.
"Bu gün bu məsələ müzakirə səviyyəsindədir və kredit təşkilatları tərəfindən informasiya sorğusu üçün qiymətin azaldılması da planlaşdırılır", - Həbibov qeyd edib.
