Türkiyə, İstanbul, 11 oktyabr /Trend, xüsusi müxbir İ.Xəlilova/
İslam Əməkdaşlıq Təşkilatı (İƏT) ölkələri arasında qarşılıqlı ticarət dövriyyəsinin payı 17-dən 70 faizə çatdırılmalıdır. Bu barədə cümə günü Trend-ə Müstəqil Sənayeçi İş adamları Dərnəyinin (MÜSİAD) baş direktoru Nail Olpak deyib.
"İƏT ölkələri arasında qarşılıqlı ticarət dövriyyəsinin potensialı 70 faizdir. Ticarət dövriyyəsinin indiki səviyyəsi imkanlardan xeyli azdır", - o qeyd edib.
Olpakın sözlərinə görə, 70 faizlik səviyyəyə çatmaq üçün İƏT-ə üzv ölkələrin iştirakı ilə biznes forumları tez-tez keçirmək lazımdır.
O, həmçinin vurğulayıb ki, Azərbaycan Türkiyə üçün vacib ölkədir və MÜSİAD tərəfindən təşkil edilən beynəlxalq biznes forumda Azərbaycandan sahibkarlar qrupu iştirak edir.
Olpak MÜSİAD ilə Azərbaycan Sahibkarlar (İşəgötürənlər) Təşkilatları Milli Konfederasiyasının əməkdaşlığını xüsusilə qeyd edib.
Dünən İstanbulda XVI Beynəlxalq biznes forum və konqres, həmçinin XIV Beynəlxalq sərgi açılıb.