Azərbaycan, Bakı, 29 oktyabr /Trend, müxbir C.Nəsibova/
Azərbaycanda BMT-nin Avropa İqtisadi Komissiyasının təşkilatçılığı ilə sahibkarlıq sahəsində qadınların rolunun gücləndirilməsinə həsr edilən III Sahibkar Qadınlar Forumu keçiriləcək. Bu barədə bazar ertəsi Trend-ə Azərbaycan Respublikası Sahibkarlar (İşəgötürənlər) Təşkilatları Milli Konfederasiyasından (ASK) bildiriblər.
Tədbir ölkədə qeyri-neft sektorunun, o cümlədən kiçik və orta sahibkarlığın inkişafının hazırda prioritet olması nəzərə alınaraq təşkil ediləcək.
Forumda sahibkar qadınların üzləşdiyi problemlər, maliyyə mənbələrinə çıxış, habelə ölkənin regionlarında sahibkar qadınlar üçün maarifləndirici mərkəzlərin yaradılması məsələləri müzakirə ediləcək.
Tədbir cari il noyabrın 14-15-də ASK-nın dəstəyi ilə baş tutacaq.
ASK-dan bildiriblər ki, BMT-nin maliyyə dəstəyi və Ailə, Qadın və Uşaq Problemləri üzrə Dövlət Komitəsinin yardımı ilə adıçəkilən tədbirin Azərbaycan regionlarında da keçirilməsi planlaşdırılır.
Hazırda Azərbaycanda 8000-dən çox sahibkar qadın fəaliyyət göstərir.
