Azərbaycan, Bakı, 24 yanvar /Trend, müxbir İ.Xəlilova/
Dünya Bankı (DB) Azərbaycanda "Korporativ və büdcə sektorlarında hesabatlılıq layihəsi"nin (CAP/SAP) həyata keçirilmə müddətini bir il, yəni 2013-cü ilin sonunadək uzadıb. Bu abrədə cümə axşamı Trend-ə bankın Bakı nümayəndəliyindən bildiriblər.
"Layihənin reallaşdırılmasının icmalı üçün yanvarın 27-dən layihənin meneceri Norpulad Daniyarovun Bakıya səfəri başlanır", - nümayəndəlikdən deyiblər. Onun səfəri fevralın 3-dək davam edəcək.
Hazırda layihə çərçivəsində bir neçə tender proseduru keçirilir. Bank 2015-ci ilədək Hesablama Palatasının Strateji İnkişaf Planının həyata keçirilməsi üçün palataya dəstək göstərmək məqsədilə məsləhətçi cəlb edir.
Habelə büdcə təşkilatları üçün maliyyə və mühasibat uçotu hesabatları (FARABI) sistemləri və formaları üçün avadanlıqların və proqram təminatının alınması üzrə də tender elan edilib. Müqavilə altı aylığa nəzərdə tutulub.
Bundan başqa, DB altı ay müddətinə Azərbaycanın Peşəkar Mühasiblər Assosiasiyasının (APMA) yaradılması üçün qısamüddətli məsləhətçi cəlb edir. Assosiasiya qeyri-hökumət və qeyri-kommersiya təşkilatı formasında yaradılmalıdır.
CAP/SAP layihəsinin ümumi dəyəri 24 milyon dollardır. Layihə üzrə kredit sazişi 2008-ci ilin sentyabrında imzalanıb, 2008-ci il dekabrın 19-dan qüvvəyə minib.
