Azərbaycan, Bakı, 15 aprel /Trend, müxbir A.Axundov/
Azərbaycanda qızıl istehsalı ilə məşğul olan "Anglo-Asian Mining plc" şirkəti 2013-cü ilin birinci rübünün yekunlarına görə, "Gədəbəy" qızıl-mis mədənindən çıxarılan 8585 unsiya qızıl istehsal edib. Trend-in məlumatına görə, bu barədə bazar ertəsi şirkətin yaydığı hesabatda bildirilir.
Şirkətin hesabatına görə, 2012-ci ilin ilk rübündə qızıl istehsalı 9925 unsiya, ilin yekunlarına görə isə bu göstərici 50215 unsiya olub. 2013-cü ildə şirkət qızıl hasilatının 60 min unsiyaya çatdırılacağını proqnozlaşdırır.
Hesabatda bildirilir ki, mart ayının sonuna qədər "Anglo-Asian Mining plc" 16530 unsiya gümüş istehsal edib.
2013-cü ilin birinci rübü ərzində "Anglo-Asian Mining" 8725 unsiya qızıl satıb. Orta hesabla qızılın unsiyası 1638 ABŞ dollarına satılıb.