Azərbaycan, Bakı, 30 aprel /Trend, müxbir A.Axundov/
Son 10 ildə pul kütləsinin 34 dəfə artması nəticəsində iqtisadiyyatın monetləşmə səviyyəsi 26 faizə qalxıb. Trend-in məlumatına görə, bu barədə Azərbaycan Mərkəzi Bankının (AMB) sədri Elman Rüstəmovun Azərbaycan Banklar Assosiasiyasının "Banklar və biznes" jurnalında dərc olunan məqaləsində deyilir.
Onun sözlərinə görə, strateji valyuta ehtiyatları 29 dəfə artaraq 47 milyard ABŞ dollarına (ÜDM-in 70 faizi) çatıb və 31 aylıq mal dövriyyəsini ötüb.
"Son 10 ildə manatın ABŞ dollarına qarşı orta illik dəyişmə tempi iki faizdən çox olmayıb. Bu illər ərzində Mərkəzi Bank valyuta bazarında 11,4 milyard ABŞ dolları həcmində izafi valyuta təklifini sterilizə edərək manatın sabitliyini qoruyub", - Rüstəmov bildirib.
Onun sözlərinə görə, bank sisteminə və real sektora zəruri maliyyə dəstəyi, yumşaq pul siyasəti qlobal resessiyanın mənfi təsirlərini neytrallaşdırıb.
"Mərkəzi Bank antiböhran siyasətini minimal - ÜDM-in 5-6 faizi səviyyəsində monetar dəstək ilə həyata keçirib. Müqayisə üçün qeyd edim ki, bir sıra aparıcı ölkələrdə fasiləsiz antiböhran proqramları mərkəzi bankların balanslarının ÜDM-ə nisbətinin 20-50 faizədək artmasına səbəb olub", - Rüstəmov qeyd edib.
