Azərbaycan, Bakı, 3 may /Trend, müxbir A.Axundov/
Azərbaycan Mərkəzi Bankı (AMB) ölkədə istehlak kreditləşməsinin artımını diqqətlə izləyir. Trend-in məlumatına görə, bu barədə jurnalistlərə açıqlamasında AMB-nin İdarə Heyətinin sədri Elman Rüstəmov bildirib.
"Biz istehlak kreditlərinin artmasını diqqətlə izləyirik. Məsələ burasındadır ki, bu yeni məhsuldur. Burada dinamika yüksək olsa da, o, çox aşağı bazadan gedir. Bir neçə bank bu sahədə aktivdir. Biz onlarla sıx əməkdaşlıq edir, müntəzəm şəkildə görüşürük və təbii ki, onlara həcmləri hansı səviyyəyə qədər yüksəldə bilmələri barədə xəbərdarlıq edirik. Bu tövsiyə xarakteri daşıyır, lakin biz onun təyin olunan səviyyədən yuxarı olmaması üçün tənzimlənmə sahəsində də müəyyən işləri yerinə yetirməyə başlamışıq. Biz bank sektorunda yeni risklərin yaranmasına imkan verməyəcəyik", - Rüstəmov bildirib.
Problemli kreditlər məsələsinə toxunan Rüstəmov bildirib ki, onların əhəmiyyətli hissəsi böhran vaxtından qalıb.
"Dünya maliyyə böhranı Azərbaycana da təsir göstərdi və onda banklarda problemli kreditlər yarandı. Problemli kreditlərin əhəmiyyətli hissəsi böhran vaxtından qalıb. Belə kreditlərin əksəriyyəti ilə bağlı banklar rezervlər yaradır", - Rüstəmov bildirib.
