Azərbaycan, Bakı, 20 may /Trend, müxbir A.Axundov/
Məzənnənin əhəmiyyətli möhkəmlənməsinin qarşısını almaq və bununla da qeyri-neft sektorunun rəqabət qabiliyyətinə neqativ təsirləri neytrallaşdırmaq üçün Azərbaycan Mərkəzi Bankı (AMB) tərəfindən I rüb ərzində 844.7 milyon dollar həcmində valyuta sterilizasiyası həyata keçirilib. Trend-in məlumatına görə, bu barədə AMB-nin yanvar-mart ayları üzrə pul siyasəti icmalında deyilir.
İcmalda qeyd olunur ki, 2013-cü ilin I rübündə də Mərkəzi Bank özünün məzənnə siyasətini dəhliz daxilində ABŞ dolları/manat ikitərəfli məzənnəsinin hədəflənməsi çərçivəsində həyata keçirib: "Ölkənin tədiyyə balansında böyük profisitin mövcud olması şəraitində valyuta bazarında təklif tələbi üstələyib".
Son 5 ilin ilk rübləri üzrə manatın ABŞ dollarına qarşı məzənnəsinin orta bahalaşma göstəricisi 0,4% təşkil etsə də, dövr ərzində məzənnə demək olar ki, dəyişməyib. Məzənnənin standart deviasiyası da çox kiçik (0.0001) olub. Milli valyutanın məzənnəsinin sabitliyi ölkədə makroiqtisadi mühitə və maliyyə sektorunun sabitliyinə müsbət təsir göstərib. Manatın nominal ikitərəfli məzənnəsinin dinamikası real ikitərəfli məzənnələrin dəyişməsinə təsir göstərib. Rüb ərzində manatın məzənnəsinin sabitliyi şəraitində nominal effektiv məzənnənin dəyişimi digər valyuta məzənnələrindən qaynaqlanıb. Manat ABŞ, Avrozona, Böyük Britaniya, Türkiyə, Rusiya, Ukrayna və Gürcüstan milli valyutalarına nəzərən həm nominal, həm də real olaraq möhkəmlənib.
2013-cü ilin I rübü ərzində qeyri-neft sektoru üzrə nominal effektiv məzənnə (ümumi ticarət dövriyyəsi üzrə) 0,8% bahalaşıb. Nominal effektiv məzənnənin dəyişməsində manatın ABŞ dollarına qarşı məzənnəsinin dəyişiminin ortalama payı 32.8%, tərəfdaş ölkələrinin valyutalarının ABŞ dollarına qarşı olan məzənnələrinin dəyişiminin payı isə 67,2% təşkil edib. Aparılmış model qiymətləndirmələrə 5 görə NEM-in 1% möhkəmlənməsi qiymətləri 0,28% azaldır.
İcmalda deyilir: "Beləliklə, hesabat ilində Mərkəzi Bank manatın ikitərəfli məzənnəsinin sabitliyini təmin edib. Manatın nominal çoxtərəfli məzənnəsi isə bahalaşıb ki, bu da inflyasiya hədəfinə nail olunmasında müsbət rol oynayıb".
