Azərbaycan, Bakı, 13 sentyabr /Trend, müxbir E.İsmayılov/
Son 10 ildə Azərbaycanda avtomobillərin sayı 2,4 dəfə artaraq 511 460-dən (2003-cü il) 1 135 936 ədədə (2012-ci il) çatıb. Bu barədə cümə günü Trend-ə Dövlət Statistika Komitəsindən bildiriblər.
Hər 100 ailəyə düşən avtomobillərin sayı isə 2,6 dəfə artaraq 22-dən (2003-cü il) 46 ədədə (2012-ci il) çatıb.
Dövlət Gömrük Komitəsinin məlumatına görə, 2013-cü ilin yanvar-iyul aylarında ölkəyə 58 258 avtomobil idxal edilib ki, bunlardan 52 673-ü minik avtomobili, 4486-sı yük avtomobili, 543-ü avtobus, 556-sı isə xüsusi təyinatlı nəqliyyat vasitəsi olub.
Standartlaşdırma, Metrologiya və Patent üzrə Dövlət Komitəsinin məlumatına əsasən, cari ilin yanvar-iyul aylarında Azərbaycanda 326 minik avtomobili istehsal edilib ki, bu da ötən ilin müvafiq dövr göstəricisindən 3,4 dəfə çoxdur. Həmçinin, yanvar-iyul aylarında respublikada 147 yük avtomobili istehsal edilib ki, bu da 2012-ci ilin müvafiq dövrünün göstəricisini 72,9 faiz üstələyir.