Azərbaycan, Bakı, 23 dekabr /Trend, müxbir A.Axundov/
Azərbaycanın Ümumdünya Ticarət Təşkilatına (ÜTT) daxil olması üzrə danışıqların növbəti raundu 2014-cü il fevralın ikinci yarısında keçiriləcək. Bunu bazar ertəsi Trend-ə danışıqlar qrupunun rəhbəri, xarici işlər nazirinin müavini Mahmud Məmmədquliyev deyib.
Onun sözlərinə görə, danışıqlar fevralın 16-dan etibarən keçiriləcək və həftə ərzində davam edəcək.
Qeyd edək ki, ÜTT-nin işçi qrupu ilə görüş 2013-cü il oktyabrın sonu - noyabrın əvvəlinə planlaşdırılmışdı, lakin sonra tarix dəyişdirildi.
M.Məmmədquliyev bildirib ki, danışıqların keçirilmə tarixinin dəyişdirilməsi təşkilatın Katibliyinin məşğul olması ilə əlaqədar olub: "Katiblik hazırda ÜTT-yə daxil olmağın ən son mərhələsində olan ölkələrə üstünlük verir".
Nazir müavini daha əvvəl demişdi: "Tərəfimizdən hər şey hazırlanıb. Göndərilməli olan bütün sənədlər ÜTT Katibliyindədir".
