Azərbaycan, Bakı, 12 may /Trend, müxbir E.Əliyev/
Abşeronun Böyükşor gölünün bərpa edilməsi üzrə işlər planlaşdırılandan ucuz başa gələ bilər. Bunu bazar ertəsi Trend-ə layihənin podratçısı olan "Təmiz Şəhər" ASC-nin İdarə heyətinin sədri, Zakir İbrahimov deyib.
Onun sözlərinə görə, işlər davam edir: "İndiki mərhələdə güman etmək olar ki, həmin işlər əvvəl planlaşdırılandan daha az maliyyə vəsaitləri tələb edəcək".
Gölün bərpası iki mərhələdə həyata keçiriləcək. Reallaşdırılması 2014-2015-ci illəri əhatə edən birinci mərhələ bəndlərin köməyi ilə daha çox çirklənən ərazinin qalan su hövzəsindən ayrılmasından ibarətdir və ilkin hesablamalara görə 78,9 milyondan 149,9 milyon manatadək vəsait tələb edəcək. 2020-ci ilədək həyata keçirilməsi nəzərdə tutulan ikinci mərhələ isə 129,11 milyondan 291,183 milyon manatadək xərc tələb edəcək. İşlərin orta hesabla dəyəri 324,87 milyon manat həcmində qiymətləndirilirdi.
Onun sözlərinə görə, maliyyələşdirmə tam olaraq dövlət hesabına həyata keçiriləcək: "Xərclərin həcminə gəlincə, layihənin əhatə etdiyi göllərin hər biri üzrə zəruri yekun məbləğ işlərin təfərrüatlı planları hazırlandıqdan sonra müəyyənləşdiriləcək. Konkret müddətdən danışmaq çətindir, çünki su hövzələrinin bərpası müxtəlif vaxtlarda həyata keçiriləcək".
Qeyd edək ki, Abşeron göllərinin bərpası layihəsi 9 su hövzəsini əhatə edəcək. Bunlar Böyükşor, Xocasən, Binəqədi qəsəbəsində idman kompleksinin yaxınlığındakı göl, həmçinin Qu, Zabrat, Bülbülə və Zığ gölləridir. İlkin hesablamalara görə, onların bərpası işləri 716,14 milyon manatadək xərc tələb edə bilər.