Azərbaycan, Bakı, 27 may /Trend, müxbir E.Əliyev/
Azərbaycan Sığortaçılar Assosiasiyası (ASA) avtomobil videoregistratorlarına alternativ avadanlıq təklif edəcək. Bunu Trend-ə ASA-nın rəhbəri Orxan Bayramov deyib.
O, qeyd edib: "Biz xarici ekspertlərin iştirakı ilə seminar təşkil etdik. Onlar avtomobillərdə quraşdırmaq üçün xüsusi avadanlığın tətbiqini təklif edirlər. Yol qəzasının harada baş verməsindən asılı olmayaraq, qəza barədə məlumat real vaxt rejimində elektron qaydada göndəriləcək ki, bu da dələduzluğun səviyyəsini azaltmağa imkan verəcək. Avadanlıq avtomobilin hərəkət sürəti və zərbənin xarakteristikası haqqında məlumat toplayır ki, bu da sənədləşməyə çəkilən müvafiq xərcləri azaldacaq".
O.Bayramovun sözlərinə görə, bu tədbirlər sığorta polislərinin dəyərini azaltmağa kömək edəcək: "Şirkətlər bu xidməti tətbiq etsələr, könüllü avtomobil sığortası paketinin satışı ilə bağlı prosedurlar sadələşəcək ki, bu da qiymətlərin azalmasına gətirib çıxara bilər. Təklif etdiyimiz avadanlığın ilkin qiyməti təqribən 20-25 manat olacaq".
ASA rəhbəri qeyd edib ki, adıçəkilən qurğuların tətbiqi sığortaçıların gələn il işə salmağa planlaşdırdığı videoregistrator xidmətinə alternativdir: "Lakin videoregistratorların tətbiqi məsələsi hələ araşdırılır və təkmilləşdirilir. Üstəlik, zərbələrin dəqiq xarakteristikasını tam müəyyən etmək mümkün deyil. Təklif edilən avadanlıq avtomobilin hansı sürətlə hərəkət etdiyini, onun əyləc yolunu, deformasiyanın dərəcəsini qeydə alır. Bu da sənədləşmə və kompensasiyanın verilməsi proseslərini 1 günədək tezləşdirəcək".
Onun sözlərinə görə, hazırda avtomobil sığortasında əsas problem 40 milyon manata çatan ödənişlərin vaxtında ödənilməməsi deyil, prosedurların çətinliyidir: "Vəziyyət bank sektorundakı duruma bənzəyir. Banklar 10 il əvvəl bir çox sənədlər tələb edirdilər, hazırda isə kredit almaq üçün şəxsiyyət vəsiqəsini təqdim etmək kifayət edir. Analoji vəziyyət sığorta bazarında da müşahidə edilir. Avtomobil sahibləri sənədlərin dövriyyəsinin çoxluğundan probemlərini bəzən öz səyləri ilə həll edirlər ki, kağız işindən uzaq dursunlar".
Qeyd edək ki, hazırda Azərbaycanda 28 sığorta şirkəti (onlardan ikisinin lisenziyası müvəqqəti dayandırılıb) fəaliyyət göstərir.