Azərbaycan, Bakı, 6 iyun /Trend, müxbir Z.Qurbanova/
Azərbaycan bankları 2014-cü ilin yanvar-aprel aylarında iqtisadiyyatın kreditləşməsini ötən ilin analoji dövrünə nisbətən 24,8 faiz artırıblar. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Hesabat dövrünün nəticələrinə əsasən, banklar tərəfindən 16 245,4 milyon manat kredit verilib, o cümlədən 11 759,8 milyon manat (72,4 faiz) milli valyutada və 4485,6 milyon manat isə (27,6 faiz) sərbəst dönərli valyutada (SDV).
Müqayisə üçün, bu göstərici 2013-cü ilin yanvar-aprel aylarında 13 019,5 milyon manat (milli valyutada 9107 milyon manat və SDV-də 3912,5 milyon manat) təşkil edib.
Ümumi portfeldən vaxtı ötmüş kreditlər 8956 milyon manat (5,5 faiz) təşkil edib. Bu göstərici ötən ilin ilk 4 ayının nəticəsi üzrə 754,7 milyon manat olub. Vaxtı keçmiş kreditlərin statistikası "Aqrarkredit" bank olmayan kredit təşkilatının oxşar borclarını nəzərə almır. İl ərzində vaxtı keçmiş kreditllər 18,7 faiz artıb.
Hesabat dövrünün nəticələrinə görə, qısamüddətli kreditlər 3572 milyon manat (408 milyon manat dəyərində vaxtı keçmiş borclar daxil) olub. Bu göstərici ötən ilin yanvar-aprel aylarının yekunu üzrə 3139,8 milyon manat (375,1 milyon manat dəyərində vaxtı ötmüş borclar daxil) təşkil edib. Ölkə iqtisadiyyatında il ərzində qısamüddətli kreditlərin həcmi 13,8 faiz artıb.
Hesabat dövründə uzunmüddətli kreditləşmə 12 673,4 milyon manat (487,7 milyon manat dəyərində vaxtı ötmüş borclar daxil) olub. Ötən ilin ilk 4 ayında bu rəqəm 9879,6 milyon manat (379,6 milyon manat dəyərində vaxtı keçmiş borclar daxil) təşkil edib. İl ərzində uzunmüddətli kreditlərin həcmi 28,3 faiz artıb.
Məlumatda qeyd edildiyinə görə, ölkənin yeganə dövlət bankı - Azərbaycan Beynəlxalq Bankının kredit portfeli 34,1 faizlik xüsusi çəki ilə 5534,4 milyon manat təşkil edib, özəl banklar tərəfindən isə 63 faizlik xüsusi çəki ilə 10 241,2 milyon manat kredit verilib. Qalan 2,9 faiz bank olmayan kredit təşkilatlarının payına düşür. Onlar tərəfindən 469,8 milyon manat kredit verilib.
Azərbaycanda daha çox kreditlər ev təsərrüfatlarına verilir. AMB-nin məlumatına görə, 2014-cü ilin ilk 4 ayında ev təsərrüfatlarına bankların kredit qoyuluşlarının ümumi həcminin 40,7 faizi və ya 6610,9 milyon manat verilib.
İkinci yerdə ticarət və xidmətlər sahəsi (14,3 faiz və ya 2322,4 milyon manat), üçüncü yerdə isə tikinti və daşınmaz əmlak sektoru (13,1 faiz və ya 2127 milyon manat) qərarlaşıb.
Sənaye və istehsalat sahəsi Azərbaycanın real sektorunun kreditləşməsinin ümumi həcminin 11,7 faizini alıb ki, bu da nominal ifadədə 1908 milyon manat təşkil edir. Qeyd etmək lazımdır ki, 2014-cü ilin "Sənaye ili" elan edilməsi ilə əlaqədar bu sektor kreditləşmənin artan həcmini əldə edib. Müqayisə üçün, 2013-cü ilin nəticələrinə əsasən, sənaye sektoru ölkə iqtisadiyyatına kredit qoyuluşlarının ümumi həcminin yalnız 9,8 faizini almışdı.
Nəqliyyat və rabitənin payına kreditlərin 3,6 faizi (586,3 milyon manat) kənd təsərrüfatı və emal sahəsinin payına 4,6 faiz (750,5 milyon manat), enerji, kimya və təbii resursların payına 1,6 faiz (259 milyon manat), qalan sahələrin payına isə 10,4 faiz (1689,5 milyon manat) düşüb.
Azərbaycanda 44 bank fəaliyyət göstərir.