Azərbaycan, Bakı, 26 avqust /Trend, müxbir Zülfiyyə Qurbanova/
Azərbaycanda prosessinq mərkəzlərinin fəaliyyətinin lisenziyalaşdırılması planlaşdırılır.
Trend-in məlumatına görə, Azərbaycan Mərkəzi Bankı (AMB) tərəfindən hazırlanmış "Prosessinq fəaliyyətinə icazə verilməsi və nəzarətin həyata keçirilməsi" qaydalarının layihəsinə əsasən, prosessinq fəaliyyətinə görə lisenziya müddətsiz veriləcək. Qaydaların layihəsi Mərkəzi Bankın saytında dərc edilib.
Prosessinq mərkəzlərinin fəaliyyəti üzərində nəzarət Mərkəzi Bank tərəfindən təqdim edilən hesabatlar əsasında həyata keçiriləcək.
Bundan başqa, xidmət mərkəzləri AMB-yə illik maliyyə hesabatları, növbəti il üçün biznes planlar, beynəlxalq ödəniş təşkilatları tərəfindən audit hesabatları, eləcə də mərkəzin idarə heyətinin strukturunda dəyişiklik edilməsi barədə məlumatlar təqdim etməlidirlər.
Prosessinq mərkəzlərinin fəaliyyətinin dayandırılması və lisenziyanın geri alınması Mərkəzi Bank tərəfindən lisenziyanın verilməsindən sonra 12 ay ərzində mərkəz fəaliyyətə başlamasa, göstərilən müddətdə aşkar edilmiş pozuntuların aradan qaldırması üzrə təlimatlar yerinə yetirilməsə, həmçinin mərkəzin özünün müraciəti əsasında həyata keçiriləcək.
Prosessinq fəaliyyəti göstərən xidmət mərkəzləri bu qaydaların qüvvəyə mindiyi gündən bir il ərzində öz fəaliyyətlərinin bu sənədlərlə uyğunluğunu təmin etməlidirlər.
Azərbaycanda iki prosessinq mərkəzi fəaliyyət göstərir: "MilliKart Group" [18 yerli bank və AYİB tərəfindən təsis edilib] və "Azericard" [yeganə təsisçisi Azərbaycan Beynəlxalq Bankıdır]. Kapital Bank və "Bank of Azerbaijan" da [mərkəz yol kartlarına xidmət göstərmək üçün yaradılıb] prosessinqə malikdirlər.
