Azərbaycan, Bakı, 15 sentyabr /Trend/
Rusiya və Azərbaycanın birgə müəssisə yaratmasının vaxtı yetişib. Bu barədə Bakıda Rusiya Baş nazirinin müavini Dmitri Roqozin Azərbaycan-Rusiya hökumətlərarası komissiyasının iclasını açarkən deyib. Bu barədə Trend İTAR-TASS agentliyinə istinadən xəbər yayıb.
D.Roqozin bildirib: "İndi müxtəlif sahələrdə birgə müəssisələrin yaradılması zamanı yetişib. İstər kənd təsərrüfatı məhsullarının emalı, yaxud deyək ki, enerji sahəsində əməkdaşlıq, ya da sənaye istehsalı ilə bağlı məsələlər olsun".
O qeyd edib ki, dünyadakı son hadisələri nəzərə alsaq, Rusiya və Azərbaycanın birləşməsi üçün şərait yaranıb: "Bu gün görürük ki, idxalı əvəzetmə siyasəti çərçivəsində Azərbaycan məhsulları Rusiya bazarlarına gəlir, onlara tələbat var". Roqozin əlavə edib ki, komissiyanın iclasında təkcə iqtisadiyyatların əvvəlki əlaqələri ilə bağlı məsələlər müzakirə olunmayacaq. Onun sözlərinə görə, Azərbaycan son illər ərzində istehsalat sahəsində güclü sıçrayış edib.
Rusiya Baş nazirinin müavini qeyd edib: "Biz bunu görürük, hiss edirik, bu, bizim üçün mühüm məqamdır, birgə səylərimizin necə harmonik uzlaşdığını müşahidə edirik".
Onun sözlərinə görə, Rusiya və Azərbaycan hökumətlərarası komissiya çərçivəsində enerji məsələləri üzrə yüksək səviyyəli qrupun yaradılmasını müzakirə edəcək: "Azərbaycan Prezidentinin enerji məsələləri üzrə yüksək səviyyəli qrupun yaradılması ideyasının reallaşdırılması haqqında ayrıca danışmalıyam. Bu gün biz bunu da müzakirə edəcəyik. Bu, zamanın tələbidir".
Roqozin xatrıladıb ki, təklifi RF Prezidenti Vladimir Putin dəstəkləyib.
