Azərbaycan, Bakı, 15 sentyabr /Trend/
Azərbaycan və Rusiya arasında əmtəə dövriyyəsi rekord 3,6 milyard dollara çatıb. Trend "RİA Novosti" agentliyinə istinadən xəbər verir ki, bunu Bakıda Azərbaycan və Rusiya arasında əməkdaşlıq üzrə hökumətlərarası komissiyanın həmsədri, RF Baş nazirinin müavini Dmitri Roqozin bəyan edib.
Azərbaycan və Rusiya arasında əməkdaşlıq üzrə hökumətlərarası komissiyanın 14-cü iclası Bakıda keçirilir.
Roqozin iclasın açılışında deyib: "2013-cü ilin yekunlarına görə, dünya bazarlarında həqiqətən vəziyyətin o qədər də yaxşı olmadığına baxmayaraq, iki ölkə arasında ticarət dövriyyəsi tarixi 3,6 milyard dollar səviyyəsinə çatıb. Bu, 2012-ci ildəkindən beş faiz artım deməkdir".
Komissiyanın sonuncu iclası 2011-ci il martın 18-də Rusiya paytaxtında keçirilib. Komissiyanın fəaliyyəti bu il avqustun 20-də Moskvada həmsədrləri - RF Baş nazirinin müavini Dmitri Roqozin və Azərbaycanın Baş nazirinin birinci müavini Yaqub Eyyubov arasında keçirilən görüşdən sonra bərpa olunub.
Rusiya Azərbaycanın MDB-də əsas ticarət tərəfdaşıdır, Azərbaycanın idxalçı ölkələri arasında birinci yeri tutur.
Hazırda Azərbaycanda Rusiya kapitalı ilə 570 şirkət çalışır. Rusiya tərəfindən son illər ərzində Azərbaycanda əsas kapitala 628,4 milyon dollar sərmayə qoyulub və 10 il ərzində Rusiya iqtisadiyyatına Azərbaycan investisiyaları demək olar ki, bir milyard dollar təşkil edib.
