Azərbaycan, Bakı, 30 sentyabr /Trend, müxbir Təmkin Cəfərov/
Azərbaycanla İran sərhədində, Aslandüz (Parsabad) - Horadiz (Füzuli) bölgəsində Aslandüz-Horadiz sərhəd-keçid məntəqəsindən həm sərnişinlər, həm də yük maşınlarının rahat gediş-gəlişini təmin etmək üçün yeni körpünün tikintisi ilə bağlı danışıqlar aparılır. Bunu Trend-ə Bakıda səfərdə olan İranın Gömrük Xidmətinin rəhbəri Məsud Kərbasiyan deyib.
M.Kərbasian bildirib ki, iki ölkə arasında ticarət əlaqələrinin inkişafı məqsədilə Aslandüz-Horadiz sərhəd keçid-məntəqəsində təkcə sərnişinlərin deyil, həm də yük avtomobillərinin gediş-gəlişi üçün əlverişli şərait yaradılmalıdır: "Hər iki ölkə istəyir ki, Aslandüz-Horadiz sərhəd-keçid məntəqəsindən həm sərnişinlər, həm minik avtomobilləri, həm də yük maşınlarının keçməsi üçün şərait yaradılsın. Çünki bu sərhəd-keçid məntəqəsinin fəaliyyəti ilə Azərbaycandan Naxçıvan MR-ə məsafə 120 kilometrədək azalır".
Onun sözlərinə görə, hazırda Aslandüz-Horadiz məntəqəsindən sərnişinlərin gediş-gəlişi üçün oradakı bəndin üzərindən şərait var, lakin yeni körpü tikilərsə bu sərhəd-keçid məntəqəsi ticarət əlaqələrinin inkişafına da təkan verə bilər: "İnanıram ki, yeni körpünün tikintisi ilə bağlı danışıqlar müsbət nəticələnəcək. Gömrük xidmətləri olaraq, biz danışıqlar aparmışıq, lakin hər iki ölkənin digər qurumları arasında müxtəlif məsələlərlə bağlı razılıqlar da əldə olunmalıdır".
Qeyd edək ki, Parsabad Ərdəbil vilayətinin şimalında yerləşir və Azərbaycan Respublikası ilə təxminən 100 kilometr quru və su sərhədinə malikdir.
Azərbaycan-İran sərhədində beynəlxalq marşrutlar üzrə 6 sərhəd-keçid məntəqəsi mövcuddur ki, onlardan hazırda 5-i (Culfa, Şahtaxtı, Astara, Biləsuvar və İmişli sərhəd-keçid məntəqələri) fəaliyyət göstərir, Horadiz gömrük postu isə uzun müddətdir fəaliyyətini dayandırıb.