İyulun 14-dən 16-na kimi Moskvada "Azərbaycanda aqrar islahatların 10 illiyi" adlı konfrans keçiriləcək. Azərbaycanın Kənd Təsərrüfatı Nazirliyindən Trend ə verilən məlumata görə, tədbir Rusiya Federasiyasının Kənd Təsərrüfatı Nazirliyində keçiriləcək.
Hazırda nazirlikdə mərasimdə iştirak edəcək nümayəndələrin dəqiq siyahısı hazırlanır. "Forumda Azərbaycanın kənd təsərrüfatı naziri İsmət Abbasovun da iştirak edəcəyi istisna edilmir", -deyə Kənd Təsərrüfatı Nazirliyindən bildiriblər.
Konfransın keçirilməsində məqsəd son 10 ildə Azərbaycanda aqrar sahədə əldə olunan nailiyyətləri müzakirə etməkdir. (Azərbaycanın aqrar sektorunda ilk islahat 1995-ci ilin fevralında keçirilib).
Cari ilin sentyabrında Rusiyada bu sahədə kənd təsərrüfatı məhsullarının sərgisi və seminarın keçirilməsi də planlaşdırılıb.
Hazırki konfrans Rusiyada 2005-ci ildə Azərbaycan ilinin keçirilməsi ilə bağlı tədbirlər çərçivəsində həyata keçirilir. Rusiyada 2005-ci ilin "Azərbaycan ili" elan olunması barədə qərar2004-cü ilin aprelində Azərbaycanla Rusiya Federasiyası arasında iqtisadi əməkdaşlıq üzrə hökumətlərarası komissiyanın 8-ci iclasının protokolu ilə qəbul edilib.
