2006-cı ilin yanvarın ortalarında Azərbaycanın Dünya Ticarət Təşkilatına (DTT) daxil olmasına hazırlıq üzrə yaradılmış dövlət komissiyası növbəti danışıqlara hazırlanmış sənədləri DTT-nin katibliyinə təqdim etməlidir. AR XİN başçısının müavini, danışıqlar qrupunun rəhbəri Mahmud Məmmədquliyev Trend ə bildirib ki, bu, gələn ilin fevralın sonunda danışıqlar aparmağa imkan verəcək.
"Adətən danışıqlaradək 4-5 həftə ərzində sənədlər bu beynəlxalq təşkilatın katibliyinə təqdim edilməlidir"-deyə M.Məmmədquliyev qeyd edib.
Hazırda Azərbaycan DTT ilə danışıqların birinci mərhələsi çərçivəsində son görüşə hazırlaşır. Nazir müavininin sözlərinə görə, qarşıdakı raundda Avropa Birliyi, DTT-nin üzvü ABŞ, Kanada və Avstraliyadan olan və Azərbaycana suallar ünvanlayan nümayəndələrlə görüşlər keçiriləcək.Avqustun 1-dək üzv ölkələr üçün Azərbaycana onları maraqlandıran suallar üçün vaxt verilmişdi. Hazırda suallara cavabların hazırlığı aparılır. Bu suallar qiymət siyasəti, gömrük tərtibatı, lisenziyalaşdırma, özəlləşdhirmə, standartlaşdırma və sertifikatlaşdırma sahəsində siyasətlə bağlıdır.
Standartlaşdırma və sertifikatlaşdırma mexanizminin təkmilləşdirilməsi üçün standartlaşdırma və sertifikatlaşdırma Agentliyi yeni qanun işləyib hazırlayır. DTT-nin üzvü olan Kanada, Avstraliya, ABŞ ilə birgə tarif təklifləri iyunda həmin təşkilat katibliyi ilə danışıqlar qrupunun Cenevrədə keçirilən üçüncü görüşündə müzakirə edilib. Onlar tarifləri endirməyi təklif edir. M.Məmmədquliyevin sözlərinə görə, kənd təsərrüfatı sahəsində də ölkə qanunvericiliyinə dəyişikliklər nəzərdən keçirilir.
