Maliyyə nazirliyi Avropa yenidənqurma və inkişaf bankının (AYİB) 2006-cı ildə inflyasiyanın artım tempinin 13%-dək təşkil etməsinə aid qiymətləndirməsi ilə razılaşmır. Trend AzTI telekanalına istinadən bildirir ki, bu barədə ölkənin maliyyə naziri Əvəz Ələkbərov deyib.
Bu həftəyə qiymətləndirmə haqqında məlumatı AYİB-in Azərbaycan üzrə eksperti Anita Taçi hazırlayıb. Onun sözlərinə görə, ötən il Azərbaycan ölkənin Milli bankı tərəfindən manatın məzənnəsinin möhkəmləndirilməsi, eləcə də dövlət büdcəsi xərclərinin tutulması hesabına inflyasiyanı birrəqəmli səviyyədə saxlaya bilib.
"AYİB, DB və BVF dəqiq deyə bilmir ki, Azərbaycanda hansı inflyasiya olacaq və AYİB-in məlumatı mənasızdır" -deyə maliyyə naziri Əvəz Ələkbərov qeyd edib.
Onun sözlərinə görə, 2005-ci ildə BMİ inflyasiyada 15% naliyyəti proqnozlaşdırılıb, amma hökumət bunu birrəqəmli səviyyədə (9,6%) saxlaya bilib. Hökumət gözlənilən valyuta daxilolmaları ilə bağlı olaraq investisiya siyasətinin gerçəkləşdirilməsi, büdcə xərclərinin həyata keçirilməsi, dövlət qiymətli kağızlar bazarının inkişafı istiqamətində qabaqlayıcı tədbirlər nəzərdə tutur. Təkcə 2 il ərzində dövlət qiymətli kağızlar bazarı 2,7 dəfə artırılıb. 2006-cı ildə Milli bank və maliyyə Nazirliyi bu bazarın genişləndirilməsi imkanını nəzərdən keçirir.
Ə.Ələkbərov gözləyir ki, bu il ölkədən avadanlıq alınması və digər məqsədlərlə $1,2-1,3 mlrd. çıxarılacaq. "Buna görə də mən AYİB-in inflyasiya üzrə 13% proqnozuna şübhə edirəm. Biz həmişə BVF ilə investisiya siyasətinin təsiri, əmək haqqı, neftin qiyməti kimi məsələləri müzakirə edirik" -deyə Ə.Ələkbərov qeyd edib. O, hesab edir ki, 2006-cı ildə inflyasiyanın artım tempinin 8-9% səviyyəsində saxlanılması mümkün olacaq.
AMB tərəfindən inflyasiyanın artım tempinin saxlanılması üçün görülən tədbirlərdən biri olan milli valyuta məzənnəsinin möhkəmləndirilməsi məsələsinə toxunan nazir dəhlizin 5-6% səviyyəsində saxlanılmasını məqsədəuyğun hesab edir. Həmin dəhlizin artması ciddi nəticələrə gətirib çıxara bilər.
