Nazirlər Kabinetinin sərəncamı ilə 2007-ci il və sonrakı üç ilin dövlət büdcəsinin, eləcə də icmal büdcəsinin proqnozlarının işlənib hazırlanması üzrə dövlət komissiyası yaradılıb. Hökumətdə Trend ə bildirilib ki, büdcə gəlirlərinin formalaşdırılması üzrə rəhbərlik maliyyə nazirinin müavini Azər Bayramova tapşırılıb. Bu komissiyanın tərkibinə 11 nəfər - maliyyə, iqtisadi inkişaf, vergilər, nəqliyyat, sənaye və energetika nazirlikləri, eləcə də gömrük və statistika Dövlət komitələri, əhalinin sosial müdafiəsi Dövlət Fondu və Neft fondunun nümayəndələri daxildir.
Dövlət büdcəsinin məxaric hissəsinin formalaşdırılması üzrə komissiyaya maliyyə nazirinin birinci müavini İlqar Fətizadə rəhbərlik edəcək. Bu komissiyanın tərkibinə büdcə vəsaitlərinin ayrıldığı müxtəlif sahələri təmsil edən 15 nəfər daxildir. Sərəncamda mülkiyyət və təşkilati-hüquqi formasından asılı olmadan bütün müəssisə və təşkilat rəhbərlərinə komissiyanın sorğularına cavab verilməsi tapşırılıb.
Mədaxil hissəsinin hazırlanmasında dövlət komissiyası ölkənin sosial-iqtisadi inkişafı, vergi bazasının genişləndirilməsi göstəricilərinə, məxaric hissəsində isə xərclərin prioritetliyinə əsaslanacaq. 2007-ci ilin büdcə gəlirlərinin proqnozu mayın 1-dək hazırlanmalıdır.
