Azərbaycanda iqtisadiyyatın müəyyən sahələrinin dövlət səviyyəsində inkişafına investisiyaların cəlb olunması üçün vergi güzəştləri ayrıla bilər. Trend in verdiyi məlumata görə, bu barədə jurnalistlərə Vergilər Nazirliyinin vergi siyasəti və strateji tədqiqatlar Baş idarəsinin rəisi Akif Musayev məlumat verib.
Qeyd edək ki, İmişlidə şəkər zavodunun açılışı zamanı Azərbaycan prezidenti respublikada fəaliyyət göstərmək arzusunda olan iri xarici şirkətlərin güzəştli vergi sisteminin yaradılması barədə danışıb.
A.Musayevin sözlərinə görə, ölkənin vergi qanunvericiliyində stimullaşdırıcı amillərdən biri yerli və xarici iş adamlarından vergi tutulmasında məhdudiyyətlərin qoyulmamasıdır. Onlar vahid hüquqlara malikdirlər. Digər tərəfdən, xarici investorları hər şeydən çox sabit vergi siyasəti maraqlandırır.
"Azərbaycanda vergi sahəsində həqiqətən də sabit siyasət mövcuddur. Vergilərin siyahısı dəyişmir, onların dərəcələri isə hər il aşağı düşür, yuxarı qalxmır. Bu yaxşı amildir və Azərbaycana xarici investorların gəlişini stimullaşdırır", - deyə A.Musayev hesab edir.
Onun fikrincə, digər mühüm amil respublikada xaric üçün qazanılmış gəlirlərin təzminat imkanlarıdır ki, bu zaman bunun üçün vergi qanunvericiliyində heç bir maneə yoxdur.
Uzun müddətdən bəridir ki, Azərbaycanda kənd təsərrüfatı istehsalçıları üçün güzəştlər tətbiq edilir və bu sahəyə investisiya qoymaq istəyənlər torpaq vergisindən başqa bütün vergilərdən azad olunurlar. Bu ildən sığorta bazarının inkişafı məqsədilə də güzəştlər tətbiq edilir.