Maliyyə Nazirliyi Nazirlər Kabinetinə 2007-ci il büdcə proqnozlarının ilkin variantını təqdim edib. Hökumətdən Trend ə verilən məlumata görə, mədaxil hissəsinin artımı 47% səviyyəsində proqnozlaşdırılır. Mədaxil 5,008 mlrd. manat, məxaric isə 5,208 mlrd. manat təşkil edəcək. Beynəlxalq Valyuta Fondunun (BVF) Yaxın Şərq və Mərkəzi Asiya üzrə Departamentinin missiya rəhbəri Vitaliy Kramarenko neftin dünya qiymətlərinin bir barelə görə 69-70 dollar səviyyəsində saxlandığı təqdirdə, gəlirlərin belə artımını real hesab edir. Onun dediklərinə görə, hazırkı səfər zamanı gələn il üçün büdcə proqnozları müzakirə olunmayıb.
Azərbaycan hökuməti BVF ilə növbəti illərdə dolayı subsidiyaların azaldılması barədə planlarını müzakirə edib. Hökumət həmçinin, 2010-cu ilədək kommunal sektordakı xərclərin çıxardılmasına nail olmaq niyyətindədir.
2006-cı il büdcə proqnozlarına təkrar baxılması məsələsi hələ ilkin mərhələdədir və bu istiqamətdə dəqiq müzakirələr aparılmayıb. Valyuta Fondu Azərbaycana dair proqnozlarının dəyişdirilməsinə ehtiyac görmür. V.Kramarenko bildirib ki, BVF 2006-cı il proqnozlarını hazırlayarkən bir barel neftin qiymətini 60 dollar həcmində götürmüşdür. Halbuki, Azərbaycan büdcəsi 40 dollara hesablanıb. Hökumətdən verilən məlumata görə, 2007-ci ilə olan ilkin proqnozlarda neftin qiyməti 45 dollar həcmində göstərilib.
