2006-cı ilin I rübündə dövlət büdcəsinin mədaxil hissəsinə faktiki daxilolmalar 694,2 mln. manat həcmində proqnoza qarşı 686,7 mln. manat (ÜDM-nin 21,3%-i) təşkil edib. Bu barədə Trend ə hökumətdən bildirilb. Gəlirlər üzrə proqnoz 98,9% yerinə yetirilib. Ötən 3 ay ərzində gəlirlər 2005-ci ilin analoji dövrü ilə müqayisədə 2,3 dəfə artıb. Dövlət büdcəsinin xərcləri 2,7 dəfə artaraq 664,4 mln. manat (ÜDM-nin 20,6%-i) təşkil edib. Büdcə profisiti 22,3 mln. manat olub ki, bu da ÜDM-nin 0,7%-ni təşkil edir.
Dövlət büdcəsinin mədaxil hissəsinin strukturunda 60,4% (414,9 mln. manat) Vergilər Nazirliyinin vəsaiti hesabına təmin olunub. Vergi yığımları üzrə proqnoz 103,4% yerinə yetirilib. Gömrük rüsumları və vergilərdən daxilolmalar 126,3 mln. manat təşkil edib. Beləliklə, proqnoz 101,8% yerinə yetirilib. Dövlət Əmlakının İdarə edilməsi üzrə Dövlət Komitəsi dövlət əmlakının icarəsindən xəzinəyə 0,8 mln manat köçürüb ki, bu da planlaşdırılmış həcmdən 39,2% çoxdur. Dövlət Neft Fondu 146,2 mln manat proqnoza qarşı 125 mln. manat köçürüb ki, bu da 85,5%-ə bərabərdir. Dövlət təşkilatlarının büdcədənkənar Fondları tərəfindən tutulmaların həcmi 98,1% olub, yəni 18,3 mln. manat köçürülüb. Digər gəlirlər üzrə proqnoz 41,9% yerinə yetirilib, tutulmalar isə 1,4 mln. manat təşkil edib.
I rübdə dövlət büdcəsindən əhalinin sosial müdafiəsinə və təminatına 66,8 mln manat (10,1%), təhsilə - 99,1 mln manat (14,9%), prokurorluq, təhlükəsizlik, hüquq-mühafizə və məhkəmə orqanlarına - 46,4 mln. manat (7%) xərclənib. İqtisadiyyata sərmayə qoyuluşu - 201,9 mln. manat (30,4%), mənzil-təsərrüfat xərcləri - 8,3 mln. manat (1,2%) təşkil edib. Sənaye və tikinti sektoruna 151,5 mln. manat (22,8%), kənd və meşə təsərrüfatına - 20,1 mln. manat (3%), əmək haqlarının, pensiyaların və müavinətlərin ödənilməsi üçün 34,8% (231,1 mln. manat) büdcə vəsaiti xərclənib.
