Milli Məclisin üzvü Əli Məsimov "Təhsil krediti haqqında" yeni qanun layihəsi hazırlayıb. Bu barədə Trend ə Əli Məsimov bildirib.
Ə.Məsimovun sözlərinə görə yeni qanun layihəsi daha keyfiyyətli təhsillə yanaşı gənclərin bütün təbəqələrinin təhsil hüququndan istifadəsinə şərait yaradacaq: "Yeni qanun gənclərin təhsilin bütün sahəsinə əl atmasına imkan yaradacaq. Layihədə həm də pulsuz kommersiya təhsili ilə bağlı müddəalar əksini tapıb".
Millət vəkilinin sözlərinə görə, nəticə etibarilə "Təhsil krediti haqqında" qanun daha çox təbəqəni əhatə edəcək. O da bildirilib ki, adıçəkilən sənəd beynəlxalq təcrübəyə əsasən hazırlanıb. Ə.Məsimov onu da bildirib ki, sənədin artıq iki variantı hazırdır. Qanun layihəsi əvvəlcə iqtisadi siyasət daimi komissiyasında müzakirəyə çıxarıldıqdan sonra elm və təhsil komissiyasında baxılacaq.
Sənədin hazırlanmasında iqtisadçılar, hüquqşünaslar və dövlət orqanlarında çalışan mütəxəssislər iştirak ediblər.
