Azərbaycanın Maliyyə Nazirliyinin komissiyası 3 mln. vergi hesablama-fakturalarının hazırlanması üzrə tenderin qalibini müəyyən edib. Bu, Azərbaycanın "Çaşıoğlu" şirkəti olub. Trend in verdiyi məlumata görə, komissiyanın sədri, maliyyə nazirinin müavini Azər Bayramov bildirib ki, iyunun 15-nə kimi şirkətlərə -hesablama-fakturaları ƏDV üzrə vergiödəyicilərə paylanmalıdır. Bu vaxta kimi bütün rayon maliyyə şöbələri bu ciddi hesabat blankları ilə təmin olunmalıdır.
Maliyyə Nazirliyi hesablama-fakturaların proseduralarının tətbiqini müəyyən edən qaydalar işləyib hazırlayıb. Onlar yaxın vaxtlarda təsdiq olunacaq və onların əsasında yerli maliyyə şöbələrinin işçiləri üçün treninqlər keçiriləcək.
Maliyyə Nazirliyi mərkəzləşditrilmiş uçot aparacaq və Vergilər Nazirliyini hər ay məlumatlandıracaq. A.Bayramovun sözlərinə görə, uçot yerlərdə təşkil olunmalıdır. Vergilər Nazirliyi köhnə hesablama-fakturaların toplanmasına və məhv edilməsinə nəzarət edəcək.
Onlar vergiödəyicilərə təxminən 300 köhnə manata (6 qəpiyə) satılacaq.
Yeni hesablama fakturaları iyulun 1-dən qüvvəyə minməlidir. Bütün sifariş (3 mln.) Azərbaycanın vergiödəyicilərinin tələbatını bir illiyə ödəyəcək.
