Beynəlxalq maliyyə korporasiyasının (BMK) nümayəndəsi Aliyə Əzimovanın Trend ə verdiyi məlumata əsasən, yaxın illərdə BMK ən azı 2-3 yerli bankın kapitalında iştirak etməyi planlaşdırır.
"Biz hələlik Azərbaycan banklarında iştirak payının alınması məsələsini nəzərdən keçiririk. İstənilən halda bu bankların sayı çox olmayacaq. Mənim fikrimcə, bu rəqəm uzağı 2-3 olacaq" - deyə A.Əzimova qeyd edib.
Bu banklardan birincisi Azəriqazbank olacaq. A.Əzimovanın dediklərinə görə, məsələnin təsdiqlənməsi texniki səbəblər üzündən ləngiyir.
"Yaxın vaxtlarda məsələnin BMK-nın direktorlar şurasında təsdiqlənməsi gözlənilir. Texniki sənədləşdirmə ilə bağlı daxili prosedurlar yubanır"- deyə o qeyd edib.
BMK Azəriqazbank səhmlərinin 17,5%-nin 2,3 mln dollara alınmasını bəyan edib. Bankda hesab edirlər ki, BMK ilə müqavilənin imzalanması iyunun 15-nə qədər baş tutacaq.