Təhsil Nazirliyində Maliyyə Nazirliyi rəhbərliyinin iştirakı ilə Dünya Bankının (DB) maliyyələşdirdiyi təhsil sisteminin inkişaf layihəsinin təqdimatı keçirilib. Bu barədə, Trend ə Maliyyə Nazirliyindən xəbər verilib.
Təqdimat mərasimində təhsil naziri Misir Mərdanov iştirakçılara layihənin həyata keçirilməsinin gedişi, aparılan islahatlar, görülmüş və planlaşdırılan işlər haqqında məlumat verib.
Təhsil sistemində 10 illik islahat strategiyasının həyata keçirilməsi üçün DB Azərbaycan hökumətinin müraciəti əsasında 13,2 mln. SDR ($18 mln.) kredit ayırıb. Azərbaycanın həmin layihədəki payı $2,8 mln. təşkil edir. DB isə strategiyanın maliyyələşdirilməsini öz üzərinə götürüb. Həmin strategiya 3 mərhələdən ibarətdir. Birinci mərhələ 2003-2007-ci illərdə görüləsi təxirəsalınmaz tədbirləri əhatə edir. Birinci layihə 4 elementdən ibarətdir - təhsil sistemində keyfiyyət artımı, maliyyələşdirmə və səmərəlik, ümumi təhsilin alınması üçün bərabər şərait və idarəetmənin gücləndirilməsi.
Müzakirələr zamanı maliyyə naziri Samir Şərifov islahatların zəruriliyindən söz açaraq, layihə çərçivəsində görülən tədbirləri müsbət qiymətləndirib. Onun sözlərinə görə, layihənin uğurla başa çatdırılması üçün Maliyyə Nazirliyi yardım etməyə hazırdır.