Trend in verdiyi xəbərə görə, Ərəbistan maliyyə institutlarının, ərəb ölkələrinin işgüzar şəxslərinin iştirakı ilə investisiya konfransına hazırlıq üçün İslam İnkişaf Bankının (İİB) texniki missiyası iyunun 18-də Bakıya gəlir. Missiya iyunun 25-dək ölkədə olacaq. Konfransın noyabrın 7-9- da Bakıda keçirilməsi nəzərdə tutulur.
İİB-ın prezidenti Əhməd Məhəmmədəlinin iyunun 19-da respublikada olduğu müddətdə beynəlxalq forumun təşkili üçün 274 min ABŞ dolları məbləğində qrantın verilməsi barədə saziş imzalanacağı gözlənilirdi. Lakin saziş üzrə razılaşmalar tamamlanmadığından, həmçinin də sazişin imzalanması üçün səlahiyyət əldə olunmadığından bu mərasim təxirə salındı.
Konfransın keçirilməsi üzrə bütün xərclər İslam bankının üzərinə qoyulub, bütün daxili xərcləri (nəqliyyat və s.) isə ölkə höküməti ödəyəcək.
İqtisadi İnkişaf Nazirliyinin keçirdiyi investisiya konfranslarına bənzəyən forum sərmayələrin özəl sektora cəlb olunmasına yönələcək. Hətta forumun İİB və ərəb fondlarının işitrakı ilə hər üç ildən bir keçirilən dəyirmi masa ilə birləşdirilməsi də istisna edilmir.
Ehtimal olunur ki, İİB-nın koordinasiya qrupuna daxil olan ölkələrdən 200-250 nəfər, elə o qədər də yerli qonaq olacaq. İİB Özbəkistanda da analoji konfrans keçirib.
