İyulun ikinci həftəsindən Azərbaycanın su təsərrüfatında SKADA sisteminin yaradılma layihəsi üzrə Dünya bankının qiymətləndirmə missiyası Bakıya səfər edəcək. Bu barədə Trend ə bankın Bakı nümayəndəliyindən xəbər veriblər. Missiyanın tərkibinə bankın su təchizatı sektorunun meneceri Li Travers və irriqasiya sektorunun direktoru Yurgen Voqel daxildir. Səfər zamanı DB-nin təklif etdiyi su layihəsinin qiymətləndirilməsi gözlənilir və bankın ekspertləri su təsərrüfatı üçün strategiya təqdim edəcəklər.
Nazirlər kabinetindən verilən xəbərə görə, onlar layihə konsepsiyasını təqdim edəcəklər. İlkin razılaşmaya görə, bankın və "Azərsu"nun mövqeləri ayrılır. "Azərsu" layihəyə 9 şəhərin daxil edilməsini təklif edir, bu şəhərlərdə su təchizatı və kanalizasiya sistemi tamamilə bərpa olunmalıdır. DB isə şəhər siyahısının genişləndirilməsinin və su sisteminin müəyyən səviyyəyə çatdırılmasının tərəfdarıdır. Bu zaman bank kanalizasiya sisteminin yenidənqurulmasının layihədən çıxarılmasını təklif edir. Son razılıq hələ əldə olunmayıb.
Layihənin ilkin qiyməti 120 milyon ABŞ dolları təşkil edir. Bu layihə avtomatlaşdırılmış xəbərdarlıq, uzaq məsafədən tənzimlənmə və məlumatın əldə olunması sisteminin yaradılmasını, su təmizləyici qurğuların bərpasını nəzərdə tutur.