Beynəlxalq Maliyyə Korporasiyasının (İFC) Azəriqazbank (AGBank) səhmdarlarının tərkibinə daxil olması haqqında müqavilə sentyabrın 8-də imzalanacaq. Bu barədə Trend ə bankın Müşahidə şurasının sədri Çingiz Əsədullayev məlumat verib.
Onun sözlərinə görə, texniki səbəblərdən Asiya İnkişaf Bankı (AİB) ilə müqavilənin imzalanması qeyri-müəyyən müddətə təxirə salınıb. "BMK hələ 2006-cı ilin mart-aprel aylarından Azəriqazbankın səhmdarlarının tərkibinə daxil olmaq üzrə bütün məsələləri nizama salmağa hazırdır, ona görə də səhmlər AİB-i gözləmədən də ödənilə bilər", - deyə Ç.Əsədullayev qeyd edib.
Beynəlxalq maliyyə institutlarına veriləcək ümumi səhm paketi 35% təşkil edir. Artıq bunun üçün Azərbaycanın Milli Bankının rəsmi razılığı alınıb.
Onlar paritet münasibətlərlə daxil olacaq və hər biri 17,5% səhm almaq üçün eyni məbləğdə sərmayə qoyacaq. BMK artıq Azəriqazbankın 17,5% iştirak payını almaq üçün 2,3 mln. ABŞ dolları ödədiyini bildirib.
Hazırda bankın nizamnamə kapitalı 7,4 mln. manat, ümumi kapitalı isə təxminən 9 mln. manat təşkil edir. İlin sonunadək nizamnamə kapitalı 12 mln. manata çatdırılacaq.
