Milli Bankın yanında fəaliyyət göstərən Azərbaycan İpoteka Fondu (AİF) MDB və Avropa ölkələrində sosial ipotekanın tətbiq olunması təcrübəsinin analiz nəticələri üzrə arayışı ölkə hökümətinə təqdim edib.
"MDB ölkələrinin təcrübəsinin öyrənilməsi zamanı maraqlı yanaşmalar və sosial ipotekanın tətbiqi zamanı buraxılmış səhvlər aşkar edilib. Həmin ölkələrin uğurlarını nəzərə alaraq, Azərbaycanda sosial ipoteka üzrə daha da irəliləmiş güzəştlərlə sadələşdirilmiş sistemin yaradılması nəzərdə tutulub", - bu barədə Trend ə AİF-in icraçı direktoru Faiq Məmmədov məlumat verib.
Onun sözlərinə görə, Qazaxıstanda sosial ipoteka üzrə kredit faizi 8% təşkil edir, Azərbaycanda isə bu gün artıq verilmiş 30% ipoteka kreditlərində bu, 8% səviyyəsindədir.
Rusiya və Ukraynada sosial ipoteka demoqrafik amillərə əsaslanır və bu, əhalinin sayının artırılması məqsədi ilə prioritetdir.
"Azərbaycan bu cür problemlərlə qarşılaşmır, ona görə də bizdə əhalinin gəlir səviyyəsi nəzərə alınmalıdır. Qazaxıstan və Rusiya ekspertləri AR üçün hazırlanmış sosial ipoteka üzrə modeli yüksək qiymətləndirib", - deyə F.Məmmədov qeyd edib.
Əsas parametrlər modelinin layihəsində ilkin ödəniş məbləğinin azaldılması və ya kredit borcunun silinməsi üçün dövlət büdcəsindən ünvanlı subsidiyaların verilməsi, həmçinin kreditin verilmə müddətinin artırılması nəzərdə tutulub.
Əvvəlki varianta əsasən ipoteka kreditinin ödənilmə müddəti 25 ildir, kredit üzrə annuitet məbləğ 50% azaldılıb. Əgər hazırda kreditin qeydiyyatdan keçirilməsi zamanı gələcək mənzilin dəyərindən 30% ödəmək lazımdısa, o zaman gənc ailələr üçün bu məbləği iki dəfə azaltmaq təklif olunub. Kredit üzrə faiz isə illik 12% səviyyəsində təklif olunub.
Gənclər və İdman Nazirliyinin ilkin hesablamalarına görə, respublikada həyat şəraitinin yaxşılaşdırılmasına ehtiyac duyan təxminən 50 min gənc ailə var.
