Milli Bankın nəzdində fəaliyyət göstərən Azərbaycan İpoteka Fondu (AİF) 2006-cı ilin sonunadək ötən ilin büdcəsindən fondun hesabına köçürülmüş 6 mln AZN-nin tam mənimsənilməsinə ümid edir. Fondun icraçı direktoru Faiq Məmmədovun Trend ə verdiyi məlumata görə, bugünədək 1,848 mln AZN məbləğində 86 kreditin verilməsi üçün ayrılmış vəsaitin 1/3 hissəsi sərf olunub. Vəsaitlərin mənimsənilməsinin başa çatmaması ilə əlaqədar bu il üçün nəzərdə tutulmuş 20 mln AZN hələ AİF-ə köçürülməyib.
O hesab edir ki, ilin sonunadək ipoteka kreditlərinin verilmə tempi artacaq. Sosial ipoteka da cəlb olunmaqla 200-dən artıq kreditin verilməsi planlaşdırılır.
2007-ci ildə dövlət büdcəsindən əlavə vəsaitlər ayrılacaq, həmçinin, sosial ipoteka və təkrar maliyyələşdirmə çərçivəsində subsidiyaların verilməsi də nəzərdə tutulacaq. Son iki ay ərzində AİF tərəfindən 42 kredit verilib və müzakirədə 180 rəsmi müraciətin olması ipoteka kreditləşməsi sisteminə böyük marağın olmasına dəlalət edir. Birinci ilə müqayisədə sonuncu ayda 5,5 dəfədən çox kredit verilib. Bugünədək verilmiş kreditlərin 22-si yenidən maliyyələşdirmə hesabına təmin olunub. Bununla əlaqədar agent-bankların hesabına 482 min manat köçürülüb.
Sistemə qoşulmuş 12 bankdan (ipoteka kreditləşməsinin başlanmasından bəri 15 bank AİF-in agenti olub) kreditlərin böyük hissəsi (30) Texnikabank tərəfindən verilib. Daha sonra Bank Standard (9 kredit), Nikoyl Bank (8), Turan Bank (7) və digər banklar gəlir.
