Qazaxıstan Bakı limanında taxıl qəbul edən terminallar və dəyirman kompleksləri inşa etmək niyyətindədir. Trend in KAZİNFORM-a istinadən xəbər verdiyi kimi, bu planlar Qazaxıstan Parlamentinin Məclisinə təqdim olunmuş hökumətin yaxın iki il (2007-2009-cu illər) üçün ortamüddətli planında öz əksini tapıb.
Analoji obyektlərin Əmirabadda (İran), Poti limanında da inşası planlaşdırılır.
Hazırda Bakıda "Bakı taxıl terminalı" ASC taxıl terminalı inşa edilir. Terminalın təməlqoyma mərasimi mayın 6-da keçirilib. Azərbaycan-Qazaxıstan müştərək müəssisəsi olan və Azərbaycanın "Planeta L" şirkəti ilə Qazaxıstanın "Ərzaq korporasiyası" SC tərəfindən təsis olunmuş terminal Hövsan qəsəbəsində yerləşir. Terminalın 2006-cı ilin sonunda açılması planlaşdırılır. Onun ildə 500 min tondan 800 min tonadək taxıl təşkil edəcəyi gözlənilir.
Qazaxıstan taxılının qəbulu və boşaldılması üçün Bakıda taxıl terminalının inşası haqqında qərar Azərbaycan-Qazaxıstan hökumətlərarası komissiyasının 2005-ci ilin mayında Bakıda keçirilmiş iclasında qəbul olunub.
