Azərbaycan Dövlət İnvestisiya Şirkətinin (AİŞ) nizamnamə kapitalının formalaşması üçün artıq 60 mln. manat ayrılıb. Bu barədə Trend xəbər verir. Azərbaycan Dövlət Neft Fondu icraçı direktoru Şahmar Mövsümovun bugünkü mətbuat konfransında verdiyi məlumata görə, 2006-cı ilin sonunadək elan edilmiş həcm tamamilə ödəniləcək. Dövlət Neft Fondunun hesabına şirkətin nizamnamə kapitalı üçün ümumilikdə 90 mln. manatın ayrılması planlaşdırılıb.
Onun sözlərinə görə, gələn il üçün investisiya şirkəti kapitalının sonradan artırılması nəzərdə tutulub.
Ş.Mövsümov qeyd edib ki, ölkə prezidentinin bu yaxınlarda keçirilmiş toplantıda investisiya şirkətinin fəaliyyətinin fəallaşdırılmasına dair tapşırıqları ilə əlaqədar hazırda bir sıra layihələr təhlil olunur və qısa vaxt ərzində onlar ölkə başçısına təqdim olunacaq.
AİŞ qeyri -neft sektorunun inkişafı üçün investisiya qoyuluşlarının təşviqi, bu sahədə fəaliyyət göstərən müəssisələrdə maddi və texnoloji bazanın yenilənməsi məqsədi ilə AR prezidentinin 30 mart 2006-cı il tarixli sərəncamına əsasən yaradılıb.
