17 oktyabr 2006-cı il tarixdə Minskdə Azərbaycan və Belarus Respublikaları arasında 2015-ci ilə qədər uzunmüddətli sosial-iqtisadi əməkdaşlıq haqqında imzalanmış proqram yaxın vaxtlarda qüvvəyə minəcək.
Çərşənbə günü Azərbaycanın Nazirlər Kabinetindən Trend ə verilən məlumata görə, bunun üçün iki ölkənin Xarici İşlər Nazirləri arasında nota mübadiləsi olmalıdır və bu zaman tərəflər reallaşdırılmanın başlanması faktını tanıyacaqlar.
Bu həftə Belarus prezidenti öz fərmanı ilə proqramı təsdiq edib.
O, Belarus və Azərbaycanın iqtisadi, ticarət, humanitar və sosial sahələrdə münasibətlərinin qarşılıqlı faydalı əsasda sonrakı inkişafına yönəlib. Uzunmüddətli proqramın reallaşdırılması iki ölkə arasında əldə olunmuş münasibətlərin yüksək səviyyəsini möhkəmləndirəcək, uzunmüddətli ikitərəfli əlaqələrin konstruktiv inkişafına yeni təkan verəcək.
Azərbaycanın Rusiya ilə də analoji iqtisadi proqramları var və bu, 2010-cu ilə qədər, Ukrayna ilə olan proqram isə - 2009-cu ilə qədər nəzərdə tutulub. "Ölkə xüsusi strateji marağının olduğu ölkələrlə uzunmüddətli əməkdaşlıq istiqamətlərini hazırlayır", - deyə Nazirlər Kabinetində qeyd olunub.
