Fevralın sonunadək Bakıya səfər çərçivəsində Azərbaycanın Nəqliyyat Nazirliyinə Gürcüstan sərhədinə qədər sürət qatarının yaradılması məqsədilə tövsiyələr təqdim etmək üçün Koreya nəqliyyat nümayəndə heyətinin gəlişi gözlənilir. Nəqliyyat Nazirliyindən Trend ə verilən məlumata əsasən, tövsiyələr Azərbaycan tərəfinin təklifləri əsasında və bu marşrutda dəmir yolunun vəziyyətinə əsasən olacaq. Bu marşrutla tanışlıq Koreya mütəxəssislərinin 2006-cı ilin dekabrında respublikaya baş tutmuş səfəri çərçivəsində həyata keçirilib.
"Bu mütəxəssislər Azərbaycan Nəqliyyat Nazirliyinin sıx əməkdaşlıq etdiyi Cənubi Koreya Nəqliyyat Nazirliyi və Koreya Nəqliyyat İnstitutunun himayəsi altında cəlb olunub", deyə nazirlikdə qeyd olunub.
Hazırda Bakıdan Böyük Kəsiyə Gürcüstan sərhədinə qədər olan dəmir yolu 30km/saat və yalnız bəzi hissələrində 160km/saat sürətlə işləyir.
Azərbaycan nətqliyyatçıları birinci mərhələdə onun sürətini 80 km/saatdan tədricən 150 km/saata çatdırmağı təklif edib. Buna paralel olaraq ikiqat xərcləri aradan qaldırmaq, gələcəkdə sürəti inkişaf etdirmək üçün torpaqda aşağı infrastrukturun tikintisi üçün tədbirlərin həyata keçirilməsi nəzərdə tutulub.
Layihənin dəyəri texniki-iqtisadi əsaslandırmadan asılı olacaq. Bu istiqamətdə koreyalı mütəxəssislərlə yanaşı, Yaponiyanın beynəlxalq əməkdaşlıq bankının (JBİC) məsləhətçisi - Itochu Corporation ilə də tədqiqatlar aparılır. O, bankın 250-280 min dollar çərçivəsində olan texniki yardım əsasında texniki-iqtisadli əsaslandırmanı işləyib hazırlayır.
Sürət qatarının yaradılması Bakı - Böyük Kəsik - Gürcüstan sərhədi dəmir yol infrastrukturunun təkmilləşdirilməsi layihəsi çərçivəsində nəzərdə tutulub. Nəqliyyat Nazirliyində Azərbaycan dəmir yolunun bir çox hissələrinin təkmilləşdirməyə ehtiyac olduğunu hesab edirlər. Buna görə də maliyyələşdirməyə müxtəlif mənbələrdən vəsaitlər cəlb oluna bilər. Şimal, cənub istiqamətlərində, şəhər ətrafı istiqəmətdəki elektrik qatarları, Sumqayıt istiqamətində sürətlərin inkişaf etdirilməsi lazımdır.