Azərbaycan,Bakı/müxbir Trend İ.Xəlilova/"Azərbaycan İnvestisiya Şirkəti" (AİŞ) SC Azərbaycanda İslam İnvestisiya Fondunun yaradılması ilə bağlı müzakirələr üzrə İslam İnkişaf Bankının (İİB) mütəxəssislərinin səfərini gözləyir. Bu barədə AİŞ-in icraçı direktoru Anar Axundov məlumat verib.
"Təkliflər hələ yoxdur, lakin bu məsələ ilə bağlı İqtisadi İnkişaf Nazirliyi, investisiya şirkətləri və İİB ilə işçi yazışma işi aparılır", deyə A.Axundov bildirib.
Fond AİŞ-in iştirakı ilə səhm payı 10%-dən çox olmamaqla yaradılacaq.
"İştirakımız nə qədər az olsa, biz menecmentə daha çox xarici investor cəlb edə bilərik. Bu vəsaitlər perspektivdə ölkənin qeyri-neft sahəsində layihələrin maliyyələşdirilməsinə istiqamətləndiriləcək", deyə A.Axundov qeyd edib.
İnvesitisiya fondunun ilkin kapitalı ilkin olaraq 90-100 milyon dollar təşkil edəcək.
Bu maliyyə institutunun yaradılması təşəbbüsü İİB-in prezidenti Əhməd Məhəmməd Əli tərəfindən 8-9 noyabr 2006-cı il tarixində Bakıda ərəb institut və investorlarının iştirakı ilə keçirilən konfransda irəli sürülüb.
1992-ci ildən İİB Azərbaycanda 250 milyon dollar məbləğində 26 layihə maliyyələşdirib.
